مکیش امبانی کا وعدہ، کم لاگت پر جیو اے آئی خدمات فراہم کرے گا

نئی دہلی، 19 فروری (یو این آئی) ریلائنس انڈسٹریز کے چیئرمین اور منیجنگ ڈائریکٹر مکیش امبانی نے جمعرات کے روز جیو نیٹ ورک کے ذریعے کم لاگت پر مصنوعی ذہانت (اے آئی) خدمات فراہم کرنے کا وعدہ کیا اور کہا کہ کمپنی اس میں سات برسوں کے دوران 10 لاکھ کروڑ روپے کی سرمایہ کاری کرے گی مسٹر امبانی نے یہاں بھارت منڈپم میں انڈیا اے آئی امپیکٹ کانفرنس میں اعلان کیا کہ جس طرح گروپ کی ٹیلی کام کمپنی جیو نے ملک میں ڈیٹا سستا کیا، اسی طرح اب اے آئی کو بھی عام ہندوستانی تک سستی شرحوں پر پہنچایا جائے گا۔ انہوں نے کہا کہ ہندوستان ذہانت کرائے پر نہیں لے سکتا اور جیو ملک کو انٹرنیٹ دور کے بعد اب انٹیلی جنس دور سے جوڑے گا۔ انہوں نے کہا کہ جیو اور ریلائنس انڈسٹریز آئندہ سات برسوں میں اس سمت میں 10 لاکھ کروڑ روپے کی سرمایہ کاری کریں گی۔
یہ سرمایہ کاری ملک میں مضبوط اے آئی ڈھانچہ قائم کرنے اور آنے والی دہائیوں کے لیے معاشی مضبوطی یقینی بنانے کے مقصد سے کی جائے گی۔ انہوں نے کہا کہ جیو اپنے نیٹ ورک کے ذریعے ملک بھر میں ایسی کمپیوٹ صلاحیت فراہم کرے گا، جس سے اے آئی خدمات کم لاگت اور تیز رفتار سے لوگوں، دکانوں، اسکولوں، اسپتالوں اور کھیتوں تک پہنچ سکیں۔ جیو اے آئی ہندوستانی زبانوں میں کام کرے گا، تاکہ کسان، نوجوان، طلبہ اور چھوٹے کاروباری اپنی زبان میں اس سے فائدہ اٹھا سکیں۔
تعلیم کے لیے جیو شکشا اے آئی، صحت کے لیے جیو آروگیہ اے آئی، زراعت کے لیے جیو کرشی اور عام استعمال کے لیے جیو ہندوستان آئی کیو جیسے پلیٹ فارم پیش کیے جائیں گے، جو مقامی زبانوں میں اے آئی پر مبنی مدد فراہم کریں گے۔ مسٹر امبانی نے بتایا کہ کمپنی گجرات کے جام نگر میں مرحلہ وار ملٹی گیگاواٹ اے آئی ریڈی ڈیٹا سینٹر پارک تیار کر رہی ہے۔ اس سال کے آخر تک 120 میگاواٹ صلاحیت شروع کرنے کا ہدف ہے، جسے آگے گیگاواٹ سطح تک بڑھایا جائے گا۔ یہ مکمل طور پر سبز توانائی پر مبنی ہوگا۔ اے آئی سے متعلق جاری خدشات پر انہوں نے کہا کہ اے آئی ملازمتیں نہیں چھینے گا بلکہ اعلیٰ مہارت والے کاموں میں نئے مواقع پیدا کرے گا۔