ریلوے پانچ سال میں 500 کارگو ٹرمینل تعمیر کرے گی، اب عام کوچ میں بھی صفائی کی بہتر سہولت ہوگی: ویشنو

نئی دہلی، 14 فروری (یواین آئی)
ریلوے مال برداری اور لاجسٹک سہولتوں کے فروغ کے لیے آئندہ پانچ برسوں میں ملک کے مختلف حصوں میں 500 کارگو ٹرمینل تعمیر کرے گی۔ ان کی منصوبہ بندی اور تعمیر پی ایم گتی شکتی پلیٹ فارم کے تحت ریاستی حکومتوں اور متعلقہ محکموں کے تعاون سے کی جائے گی۔
ریلوے وزیر اشونی ویشنو نے ہفتہ کو یہاں صحافیوں کو ریلوے کی جانب سے کیے گئے دو اصلاحات کے بارے میں بتایا۔ انہوں نے کہا کہ وزیراعظم نریندر مودی کی قیادت میں ریلوے مسافروں کو بہتر سہولت دینے کے لیے پرعزم ہے اور اسی کے تحت اس سال کے 52 ہفتوں میں 52 اصلاحات نافذ کی جائیں گی۔ ان اصلاحات کا مقصد مسافروں کو بہتر سہولت فراہم کرنا اور ریلوے کو جدید بنانا ہے۔
پہلی اصلاح کے طور پر ریلوے نے عام کوچوں میں طویل سفر کرنے والے مسافروں کو صفائی کی بہتر سہولت دینے کا ہدف مقرر کیا ہے۔ اس کے تحت مرحلہ وار مہم چلائی جائے گی۔ پہلے مرحلے میں ملک بھر کی 80 ٹرینوں کو منتخب کیا گیا ہے۔ ان میں ٹوائلٹ میں کچرا دان رکھے جائیں گے، مکینیکل خرابیوں کی جانچ ہوگی اور مصروف وقت میں اضافی عملہ تعینات کیا جائے گا۔
ریلوے وزیر نے بتایا کہ صفائی کو مضبوط بنانے کے لیے ایک مربوط نظام نافذ کیا جائے گا۔ اس کی نگرانی کے لیے کنٹرول روم قائم ہوگا، جہاں اے آئی (مصنوعی ذہانت) پر مبنی تصاویر بھیجی جائیں گی تاکہ یہ جانچا جا سکے کہ صفائی معیار کے مطابق ہوئی یا نہیں۔ اگر صفائی ناقص پائی گئی تو ذمہ دار ملازم کے خلاف کارروائی ہوگی۔ بہتر کام کرنے والے ٹھیکیداروں کو ہی آگے کا ٹھیکہ دیا جائے گا۔ اس کے لیے راستہ پر مبنی ٹیمیں کام کریں گی تاکہ ہر ٹرین میں باقاعدہ نگرانی ہو اور مسافروں کو صاف ستھرا ماحول ملے۔
دوسری اصلاح کے طور پر ریلوے نے کارگو ٹرمینل میں اضافہ کرنے کا فیصلہ کیا ہے۔ ریلوے نے 2022 میں گتی شکتی کارگو ٹرمینل اسکیم شروع کی تھی اور گزشتہ تین برسوں میں اس کے تحت ملک کے 18 ریاستوں میں 124 کارگو ٹرمینل بنائے گئے ہیں، جن سے تقریباً 20,000 کروڑ روپے کی آمدنی ہوئی ہے۔ اب آئندہ پانچ برسوں میں 500 کارگو ٹرمینل بنانے کا ہدف رکھا گیا ہے۔ اس سے مال برداری میں تیزی آئے گی، صنعتوں کو فائدہ ہوگا اور ریلوے کی آمدنی میں بڑا اضافہ ہوگا۔ ریلوے کو امید ہے کہ اس سے تقریباً 30 ہزار کروڑ روپے کی اضافی آمدنی حاصل ہوگی۔
ریلوے مسافروں کو بہتر سہولت دینے اور کاروبار کو فروغ دینے کے لیے مسلسل اصلاحات نافذ کر رہی ہے۔