۲۴فروری تک موسم میں کسی بڑی تبدیلی کا امکان نہیں

سرینگر: محکمہ موسمیات کی پیش گوئی کے مطابق وادی کشمیر میں۲۴فروری تک بڑے پیمانے پر برف وباراں کا کوئی امکان نہیں ہے۔
محکمے کے ایک ترجمان نے بتایا کہ وادی میں۱۴؍اور۱۵فروری کو موسم عام طور پر خشک رہنے کا امکان ہے تاہم۱۶فروری کی شام سے۱۷فروری صبح تک پہاڑی علاقوں میں کہیں کہیں ہلکی برف باری ہوسکتی ہے۔
انہوں نے کہا کہ۱۸سے۲۴فروری تک موسم مجموعی طور پر خشک رہنے کا امکان ہے۔
ان کا کہنا ہے کہ وادی میں۲۵؍اور۲۶فروری کو موسم ابر آلود رہنے کے ساتھ کہیں کہیں ہلکی برف باری یا بارشوں کا امکان ہے۔
ترجمان نے کہا کہ بعد میں۲۷؍اور۲۸فروری کو موسم ایک بار پھر خشک رہ سکتا ہے۔انہوں نے کہا کہ جموں وکشمیر میں۲۴فروری تک موسم میں بڑے پیمانے پر برف باری یا بارشوں کا کوئی امکان نہیں ہے۔
محکمے نے اپنی ایڈوائزری میں کسانوں سے کہا ہے کہ وہ اس دوران اپنے کھیت کھلیانوں اور باغوں میں اپنے کام جاری رکھ سکتے ہیں۔انہوں نے کہا کہ وادی کے بیشتر مقامات پر دن کے درجہ حرارت میں بتدریج اضافہ متوقع ہے۔
لوگوں سے کہا گیا ہے کہ وہ ٹریفک اور انتظامیہ کی طرف سے جاری مشوروں پر عمل کریں جبکہ پہاڑی علاقوں کے لوگوں سے کہا گیا ہے کہ وہ ان علاقوں میں جانے سے گریز کریں جہاں برفانی تودے رہنے کے خطرات رہتے ہیں۔
محکمے کے مطابق وادی کے بشیتر علاقوں میں شبانہ درجہ حرارت معمول سے۰سے۲ڈگری سینٹی گریڈ زیادہ ریکارڈ ہوا ہے۔
وادی میں سیاحتی مقام پہلگام سرد ترین علاقہ رہا ہے جہاں کم سے کم درجہ حرارت منفی4.2 ڈگری سینٹی گریڈ ریکارڈ ہوا ہے جبکہ صوبہ جموں میں بھدرواہ سرد مقام رہا ہے جہاں شبانہ درجہ حرارت1.0 ڈگری سینٹی گریڈ ریکارڈ ہوا ہے۔