فورسز ملک بھر سے دہشت گردی کے خاتمے کو یقینی بنانے کے لئے پر عزم:سنگھ 

سرینگر: پلوامہ دہشت گرد حملے کی ساتویں برسی کے موقع پر سینٹرل ریزرو پولیس فورس(سی آر پی ایف) کے ڈائریکٹر جنرل (ڈی جی) جی پی سنگھ نے ہفتے کے روز کہا کہ سیکورٹی فورسز ملک بھر سے دہشت گردی کے خاتمے کو یقینی بنانے کے لئے پر عزم ہیں۔
سنگھ نے ہفتے کے روز۱۴فروری۲۰۱۹کو جنوبی کشمیر کے ضلع پلوامہ کے لیتہ پورہ علاقے میں جیش محمد سے وابستہ ایک خود کش بمبار کے سی آر پی ایف کی کانوائے کے ساتھ ٹکرانے کے نتیجے میں اپنی جانیں گنوانے والے جوانوں کو خراج عقیدت پیش کیا۔ اس واقعے میں۴۰اہلکار جاں بحق ہوئے تھے۔
لیتہ پورہ میں واقع شہدا میموریل پر گلہائے عقیدت پھول چڑھانے کے بعد موصوف ڈی جی نے میڈیا کوبتایا’’سی آر پی ایف اور اس کی فیملی ویلفئر آرگنائزیشن شہدا کے خاندانوں کو ہر ممکن مدد کے لئے پوری طرح پر عزم ‘‘۔
سنگھ نے کہا’’ہر خاندان کو۲کروڑ ۵۲ لاکھ سے۳کروڑ روپے تک مالی امداد فراہم کی گئی ہے جبکہ۱۹ خاندانوں کو دیگر مقامی حکومتوں کے تعاون سے زمین فراہم کی گئی ہے‘‘۔
ان کا کہنا تھا’’شہدا کے بچوں کی تعلیم اور ہمدردانہ بنیادوں پر ملازمتوں کے ذریعے معاونت کی جا رہی ہے‘‘۔ سنگھ نے کہا کہ فورس نے’’بریو فیملی ایپ‘‘ کا آغاز کیا ہے تاکہ خاندان روز مرہ کے مسائل اٹھا سکیں اور سی آر پی ایف ویلفئر ڈائریکٹوریٹ سے رابطے میں رہیں۔
سنگھ نے کہا کہ آرگنائزیشن بعد کی کارروائیوں میں شہید ہونے والے اہلکاروں کے خاندانوں سے بھی مسلسل رابطے میں ہے اور ان کے مسائل حل کرنے کے لئے پر عزم ہے۔
سی آر پی ایف کے ڈی جی کا کہناتھا’’سی آر پی ایف کی جانب سے میں تمام خاندانوں کو یقین دلانا چاہتا ہوں کہ ہم ہمیشہ ان کے ساتھ کھڑے ہیں، سی آر پی ایف ملک بھر سے دہشت گردی کے خاتمے کے لئے پر عزم ہے‘‘۔
لیتہ پورہ میں منعقدہ تقریب میں پھول چڑھانے کی پریڈ، گارڈ آف آنر کے علاوہ شہدا کے اعزاز میں دو منٹ کی خاموشی بھی اختیار کی گئی۔ سی آر پی ایف نے خراج عقیدت کے طور پر سالانہ روایت کے مطابق خون کے عطیے کا کیمپ بھی منعقد کیا جس میں افسروں اور جوانوں نے رضاکارانہ طور پر سو سے زیادہ یونٹ خون عطیہ کیا جو ایس ایم ایچ ایس ہسپتال سری نگر کو فراہم کیا گیا۔
اس تقریب کے موقع پر فوج، پولیس، سی آر پی ایف اور سول انتظامیہ کے اعلیٰ افسران موجود تھے۔