بانڈی پورہ،گریز سڑک کھول دیگئی‘ گاڑیاں بحفاظت منزل پہنچ گئیں

بانڈی پورہ: موجودہ موسمی حالات کے درمیان مسافروں کی محفوظ آمدورفت کو یقینی بنانے کے لیے آج بانڈی پورہ،گریز سڑک کو محدود ٹریفک کے لیے کھول دیا گیا۔
ایک سرکاری بیان میں کہا گیاہے کہ یہ نقل و حرکت ضلع انتظامیہ بانڈی پورہ کی نگرانی میں متعلقہ محکموں کے اشتراک سے انجام دی گئی۔
مقررہ وقت کے دوران کل۲۳گاڑیوں کو بانڈی پورہ سے گریز کی جانب جانے کی اجازت دی گئی۔ کسی بھی ہیوی موٹر وہیکل کو اجازت نہیں دی گئی اور صرف اینٹی اسکیڈ چینز سے لیس گاڑیوں کو آگے بڑھنے دیا گیا۔
حفاظتی وجوہات کی بنا پر مخالف سمت یعنی گریزسے بانڈی پورہ کی جانب ٹریفک محدود رہی۔
اہم بات یہ ہے کہ آنے والے مقدس مہینے رمضان کے پیش نظر ضروری اشیاء لے جانے والی گاڑیوں کو بھی گزرنے کی اجازت دی گئی تاکہ گریز میں ضروری سامان کی بروقت دستیابی یقینی بنائی جا سکے۔ اس پیش رفت سے مقامی باشندوں میں اطمینان اور خوشی پائی گئی، خصوصاً جب مقدس مہینے کی تیاریاں شروع ہو رہی ہیں۔
تمام مجاز گاڑیاں کامیابی کے ساتھ گریز پہنچ گئیں اور ٹریفک کی نقل و حرکت ہموار طریقے سے انجام پائی۔
ضلع انتظامیہ بانڈی پورہ نے مسافروں سے اپیل کی ہے کہ سرکاری ہدایات پر سختی سے عمل کریں، سفر سے قبل نامزد کنٹرول رومز کے ذریعے سڑک کی صورتحال کی تصدیق کریں اور محفوظ اور بلا رکاوٹ سفر کو یقینی بنانے کے لیے حکام سے تعاون کریں۔