سینک سہایتا کیندرا فوجیوں اور اہلِ خانہ کی فلاح کے لیے سرگرم

جموں: لیفٹیننٹ گورنر کا سینک سہایتا کیندرہ ملک کے لیے بیش قیمت خدمات انجام دینے والے حاضر سروس فوجیوں اور ان کے اہل خانہ کی مستقل حمایت اور فلاح کے عزم کا مظاہرہ جاری رکھے ہوئے ہے۔
مختلف حکام کے ساتھ فعال رابطہ اور مربوط کارروائی کے ذریعے کیندرانے متعدد درخواستوں کو کامیابی سے حل کیا اور بروقت مدد فراہم کی۔
ایک شہید کے واجبات سے متعلق درخواست موصول ہونے پر کیندرا نے حساسیت کا مظاہرہ کرتے ہوئے متعلقہ حکام سے فوری رابطہ کر کے معاملہ جلد حل کروایا۔
اسی طرح ایک حاضر سروس فوجی کی جانب سے اپنے کمانڈنگ آفیسر کے ذریعے پیش کی گئی درخواست پر مہاجر سرٹیفکیٹ کے اجرا میں بھی کیندرہ نے ترجیحی بنیادوں پر کارروائی کرتے ہوئے متعلقہ محکموں کے ساتھ رابطہ قائم کیا جس کے نتیجے میں سرٹیفکیٹ جاری ہوا اور شکایت کا ازالہ ہوگیا۔
کیندرا نے ایک اگنی ویر کی جانب سے اپنے والد کی طبی ہنگامی صورتحال کے بارے میں پیش کردہ درخواست کا بھی نوٹس لیا۔ بین الریاستی طبی حکام کے ساتھ تال میل قائم کر کے سرکاری طبی مرکز میں بروقت علاج ممکن بنایا گیا اور دو دن کے اندر معاملہ حل ہوگیا، جس سے ادارے کے فوری اور نتیجہ خیز ردعمل کا اظہار ہوا۔
لیفٹیننٹ گورنر کا سینک سہایتا کیندرا مسلح افواج اور مرکزی مسلح پولیس فورسز کے حاضر سروس اہلکاروں کی فلاح کے لیے ایک اہم اقدام ہے۔
دریں اثنا ڈاکٹر مکسن ٹکو، بی جے پی سوشل میڈیا انچارج جموں و کشمیر نے آج لیفٹیننٹ گورنر منوج سنہا سے ملاقات کر کے کشمیری پنڈت برادری کے مختلف فلاحی مسائل سے آگاہ کیا۔
بعد ازاں جنرل بس اسٹینڈ جموں کے ملٹی ٹائر پارکنگ دکاندار ایسوسی ایشن کے نمائندوں نے، جن کی قیادت وشال مہاجن کر رہے تھے، جبکہ شکتی ادگھوش فاؤنڈیشن کے ایک وفد نے کنوینر پریتی چودھری کی سربراہی میں لیفٹیننٹ گورنر سے ملاقات کی۔
رکن اسمبلی ترال رفیق احمد نائیک اور جے کے اپنی پارٹی کے سینئر نائب صدر غلام حسن میر نے بھی آج لیفٹیننٹ گورنر منوج سنہا سے ملاقات کی۔