کانگریس کے طارق قرہ نے ساسکی قرضوں پر سوال اٹھایا

جموں: جموں و کشمیر پردیش کانگریس کمیٹی کے صدر طارق قرہ نے ساسکی اسکیم کے تحت نئے قرضے لینے کے فیصلے پر سوال اٹھایا ہے، کیونکہ تقریباًایک لاکھ کروڑ روپے ابھی تک غیر استعمال شدہ ہیں۔
اسمبلی میں بجٹ کے حوالے سے تبادلہ خیال کے دوران طارق قرہ نے کہا کہ اب تک صرف۱۲فیصد بجٹ کیپیٹل اخراجات پر خرچ کیا گیا ہے۔
قرہ نے استفسار کیا کہ جب پہلے سے ہی خاطر خواہ فنڈز دستیاب ہیں تو اضافی قرضے کیوں لیے جا رہے ہیں۔
کانگریسی لیڈر نے کہا’’اگر اتنی بڑی رقم غیر مستعمل ہے تو نئے قرض لینے کا جواز کیا ہے‘‘؟ طارق قرہ نے مالی انتظام اور ترقیاتی ترجیحات پر خدشات کا اظہار کیا۔
قرہ نے کہا کہ اضافی قرضہ جموں و کشمیر پر مالی بوجھ بڑھا سکتا ہے اور حکومت سے مطالبہ کیا کہ وہ موجودہ فنڈز کے استعمال اور ترقیاتی منصوبوں کے مؤثر نفاذ کی وضاحت کرے۔
کانگریس رہنما  نے کہا کہ کیپیٹل اخراجات بنیادی ڈھانچے کی ترقی اور روزگار کے مواقع پیدا کرنے میں اہم کردار ادا کرتے ہیں۔