کانگریس پارٹی کے متحارب دھڑے دہلی میں سر جوڑ کر بیٹھ گئے

نئی دہلی//
جموں کشمیر کے سینئر کانگریس لیڈروں نے قومی راجدھانی میں لگاتار دو دن تک میٹنگ کی۔ یہ میٹنگ کا دوسرا دور تھا جس میں جموں کشمیر کے تمام کانگریسی لیڈران موجود تھے۔
یہ ملاقات اس حقیقت کے پیش نظر اہم ہے کہ جموں و کشمیر کے انتخابات اس سال ہو سکتے ہیں۔
ذرائع کے مطابق میٹنگ میں موجود سینئر لیڈران غلام نبی آزاد، کے سی وینوگوپال اور امبیکا سونی نے ان پر زور دیا کہ وہ جموں و کشمیر میں آئندہ انتخابات کیلئے اجتماعی قیادت کے لیے میدان میں جائیں۔
آل انڈیا کانگریس کمیٹی (اے آئی سی سی) کے جنرل سکریٹری کے سی وینوگوپال نے خصوصی طور پر نیوز ایجنسی سے بات کرتے ہوئے کہا’’ایجنڈا بہت واضح ہے۔ ہمیں جموں و کشمیر کے انتخابات کی تیاری شروع کرنی ہے، ایک افواہ ہے کہ انتخابات آنے والے ہیں‘‘۔
وینو گوپال نے کہا’’اسی لیے ہم نے جموں کشمیر کے لیڈروں کو یہاں دہلی بلایا۔ غلام نبی آزاد، امبیکا سونی جنہوں نے گزشتہ ۲۰ سالوں سے جموں و کشمیر کو سنبھالا اور پی سی سی کے صدر، اور سینئر لیڈران سی ڈبلیو سی ممبران نے مل کر تبادلہ خیال کیا۔ یہ ایک خوشگوار ملاقات تھی۔ جموں و کشمیر ہم سب کے لیے بہت اہم ہے۔ ہمیں دوسرے ملک کو بھی یہ دکھانا ہوگا کہ جموں و کشمیر ہندوستان میں بہت زیادہ برقرار ہے‘‘۔
کانگریسی لیڈر کاکہنا تھا’’ہم نے پارٹی کو مضبوط کرنے کے طریقے پر تبادلہ خیال کیا۔ کچھ اختلافات ہیں جو میں چھپا نہیں رہا ہوں۔ اب وقت آگیا ہے کہ ساتھ چلیں اور سب نے اتفاق کیا‘‘۔
ذرائع کا کہنا ہے کہ ملاقات میں دونوں نے متحد رہنے اور آئندہ انتخابات میں ساتھ جانے کا منصوبہ بنایا۔ ان سے اختلافات ختم کرنے اور ہائی کمان کے فیصلے کا احترام کرنے کو بھی کہا گیا ہے کیونکہ حتمی فیصلہ اعلیٰ قیادت کرے گی۔
اس میٹنگ میں کانگریس قائدین غلام نبی آزاد، امبیکا سونی، کے سی وینوگوپال، غلام احمد میر، پیرزادہ محمد شیاد، طارق حمیدقرہ، رمن بھلا اور دیگر موجود تھے۔
یہ کانگریس جموں و کشمیر لیڈروں کا دوسرا دور تھا جو کانگریس کے وار روم میں منعقد ہوا۔
ذرائع کے مطابق کے سی وینوگوپال نے تمام قائدین سے ون ٹو ون ملاقات کی اور ان کے مشورے لئے اور حتمی فیصلہ ہائی کمان ہی کرے گا۔