’کٹھوعہ میں جیشِ محمد کا پاکستانی دہشت گرد ہلاک‘

جموں: ایک سرکاری اہلکار نے جمعہ کے روز بتایا کہ جموں و کشمیر پولیس، فوج اور سی آر پی ایف کی مشترکہ کارروائی میں ضلع کٹھوعہ کے بلاور کے عمومی علاقے میں جیشِ محمد  سے وابستہ ایک پاکستانی دہشت گرد کو ہلاک کر دیا گیا۔
تفصیلات فراہم کرتے ہوئے انسپکٹر جنرل آف پولیس (آئی جی پی) جموں، بھیم سین ٹوٹی نے کہا کہ یہ کارروائی جموں و کشمیر پولیس کی ایک چھوٹی ٹیم نے فوج اور سی آر پی ایف کے اشتراک سے انجام دی۔
آئی جی پی جموں نے ایکس (سابقہ ٹوئٹر) پر پوسٹ کرتے ہوئے کہا’’ضلع کٹھوعہ کے بلاور کے عمومی علاقے میں فوج اور سی آر پی ایف کے ساتھ مشترکہ کارروائی کے دوران جے کے پی کی ایک چھوٹی ٹیم نے ایک پاکستانی جیش دہشت گرد کو ہلاک کیا ہے۔‘‘
ادھر فوج کی رائزنگ اسٹار کور نے اپنے سرکاری ایکس ہینڈل پر کہا’’مخصوص خفیہ اطلاعات کی بنیاد پر۲۳جنوری۲۰۲۶کو ضلع کٹھوعہ کے عمومی علاقے پرہیتر میں فوج اور پولیس کی جانب سے مشترکہ آپریشن شروع کیا گیا۔ علاقے کو گھیرے میں لیا گیا اور رابطہ قائم ہوا۔ مشترکہ فورسز کی ایک درست کارروائی میں ایک غیر ملکی دہشت گرد کو ہلاک کر دیا گیا۔ تلاشی کارروائیاں جاری ہیں۔‘‘