مودی کو پیچھے ہٹنے اور غریبوں کے متحد ہونے کا موقع ہے ، منریگا بچانے کی لڑائی: راہل گاندھی

نئی دہلی، 22 جنوری (یواین آئی) کانگریس کے سابق صدر اور لوک سبھا میں اپوزیشن کے رہنما راہل گاندھی نے کہا ہے کہ مہاتما گاندھی قومی روزگار گارنٹی اسکیم (منریگا) کو ختم کرنے کے خلاف شروع ہوئی لڑائی میں وزیر اعظم نریندر مودی کو اپنے منصوبوں میں کامیاب نہیں ہونے دینا ہے اور منریگا کی بحالی کے لیے سب کو متحد ہونا پڑے گا۔
مسٹر گاندھی نے تخلیقی کانگریس کے سربراہ سندیپ دکشت کے زیر اہتمام "منریگا بچائو مورچہ” کے کارکنوں کے قومی مذاکرے سے خطاب کرتے ہوئے کہا کہ بھارتیہ جنتا پارٹی چاہتی ہے کہ ملک میں جمہوریت، آئین اور ایک شخص ایک ووٹ کا تصور ختم ہو جائے اور آزادی سے پہلے والا ہندوستان واپس لایا جائے ۔ اسی سوچ کا نتیجہ ہے کہ وزیر اعظم نریندر مودی نے عوام کو منریگا کے تحت ملے حقوق کو ختم کرنے کا کام کیا ہے ۔
انہوں نے کہا کہ منریگا نے غریبوں کو روزگار کی ضمانت اور عزت کے ساتھ جینے کا حق دیا تھا۔ اس کے پیچھے سوچ یہ تھی کہ جسے بھی کام کی ضرورت ہو، وہ عزت کے ساتھ حق کے طور پر کام مانگ سکے اور حق کے ساتھ اسے کام ملے ۔ منریگا پنچایتی راج کے تحت چلایا جاتا تھا اور یہ عوام کی آواز اور ان کا حق تھا لیکن وزیر اعظم نریندر مودی اسے ختم کرنے میں لگے ہیں۔ کانگریس اس کے لیے لڑ رہی ہے اور حکومت کو منریگا کی بحالی پر مجبور کرے گی۔
راہل گاندھی نے کہا کہ اس سے پہلے مودی حکومت کسانوں کے خلاف کالے قوانین لے کر آئی تھی، جسے کسانوں نے روک دیا۔ جو ناانصافی کسانوں کے ساتھ کی گئی تھی، وہی اب مزدوروں کے ساتھ کی جا رہی ہے ۔
کانگریس رہنما نے بی جے پی پر حملہ کرتے ہوئے کہاکہ "کچھ سال پہلے بی جے پی حکومت تین سیاہ زرعی قوانین لے کر آئی اور اس کے ذریعے کسانوں پر حملہ کیا لیکن کسانوں اور ہم سب نے مودی پر دبائو ڈال کر اسے روک دیا۔ اب اسی طرح کا حملہ مزدوروں پر کرنے کی کوشش ہو رہی ہے اور اب مرکزی حکومت فیصلہ کرے گی کہ کس ریاست کو کتنا پیسہ بھیجا جائے ۔ بی جے پی کی حکومت والی ریاستوں کو زیادہ پیسہ ملے گا اور اپوزیشن کی حکومت والی ریاستوں کو کم۔ مرکزی حکومت ہی طے کرے گی کہ کہاں کب کام ہوگا، کس کو کتنی مزدوری ملے گی۔ جو حقوق مزدوروں کو ملتے تھے ، اب وہ ٹھیکیداروں کو ملیں گے ۔ بی جے پی کی سوچ یہ ہے کہ ملک کی دولت اور وسائل منتخب ہاتھوں میں ہوں اور وہی لوگ اس ملک کو چلائیں۔ بی جے پی چاہتی ہے کہ ملک کی ساری دولت امیروں کے ہاتھ میں چلی جائے تاکہ غریب، دلت اور آدیواسی لوگ ان پر منحصر ہو جائیں اور ان کی بات مانیں۔”