لوک بھون میں تریپورہ‘ منی پور اور میگھالیہ کا یومِ ریاست منایا گیا

جموں: جموں و کشمیر لوک بھون میں آج جموں میں تریپورہ، منی پور اور میگھالیہ کے یومِ ریاست کی تقریبات منعقد کی گئیں۔
    ’ایک بھارت شریشٹھ بھارت‘ کے جذبے سے سرشار اس ثقافتی شام میں طلبہ، سکیورٹی اہلکاروں اور جموں و کشمیر میں مقیم تریپورہ، میگھالیہ اور منی پور کے عوام نے شرکت کی۔
    اپنے خطاب میں لیفٹیننٹ گورنر‘ منوج سنہا نے اس موقع پر تریپورہ، میگھالیہ اور منی پور کے عوام کو دلی مبارکباد پیش کی۔
    ایل جی نے تینوں ریاستوں کی ممتاز شخصیات کو خراجِ عقیدت پیش کیا اور قوم کی تعمیر میں ان کی گراں قدر خدمات کو یاد کیا۔
    لیفٹیننٹ گورنر نے کہا کہ تریپورہ، منی پور اور میگھالیہ کی ثقافتی تنوع اور بھرپور وراثت خطے کی ترقی کے لیے طاقتور انجن کے طور پر کام کر رہی ہے اور جدت، معاشی سرگرمیوں اور سماجی استحکام کو فروغ دے رہی ہے۔
    سنہا نے کہا’’معزز وزیر اعظم شری نریندر مودی کی قیادت میں اس خطے نے تاریخی ترقی کا مشاہدہ کیا ہے، جو نہ صرف معاشی ترقی کو رفتار دے رہی ہے اور امن کو یقینی بنا رہی ہے بلکہ خطے کی منفرد ثقافتی شناخت کے تحفظ اور فروغ کا ذریعہ بھی بن رہی ہے، جس سے سیاحت میں اضافہ اور مہمان نوازی کے شعبے کو تقویت ملی ہے‘‘۔
    ایل جی کاکہنا تھا کہ آج تریپورہ، منی پور اور میگھالیہ کی مقامی معیشتیں فروغ پا رہی ہیں۔ وراثت کے تحفظ اور بنیادی ڈھانچے کی ترقی، بہتر رابطہ کاری اور نئے اعلیٰ تعلیمی اداروں کے قیام سے فخر کا احساس بیدار ہو رہا ہے، جو نوجوانوں کو اپنی جڑوں سے وابستہ رہتے ہوئے جدت کی طرف راغب کر رہا ہے اور فنون و دستکاری کی بحالی کا باعث بن رہا ہے‘‘۔
    لیفٹیننٹ گورنر نے کہا’’خدا کرے کہ یہ ریاستیں آنے والے وقت میں ترقی کی نئی بلندیوں کو چھوئیں۔‘‘