’سابق فوجیوں نے قربانیاں دے کر ملک کی آزادی کی حفاظت کی ‘

راجوری: جموں کشمیر کے لیفٹیننٹ گورنر ‘ منوج سنہا نے۱۰ویں آرمڈ فورسز ویٹرنز ڈے کے موقع پر راجوری کے اے ایل جی میں منعقدہ ایک یادگاری تقریب میں سابق فوجیوں، ویر ناریوں اور ان کے اہلِ خانہ کو خراجِ عقیدت پیش کیا۔
اس موقع پر ایک اجتماع سے خطاب کرتے ہوئے لیفٹیننٹ گورنر نے کہا کہ ہمارے سابق فوجی زندہ تاریخ کی علامت ہیں اور ان کی قربانیوں نے نہ صرف ہماری آزادی کی حفاظت کی بلکہ ایک عظیم قوم کی تقدیر بھی تشکیل دی۔ انہوں نے کہا کہ مسلح افواج کی بے لوث خدمت محض ایک ملازمت نہیں بلکہ عمر بھر کی وابستگی ہے، جو فوجی کیریئر کے اختتام اور وردی اتار دینے کے بعد بھی جاری رہتی ہے۔
لیفٹیننٹ گورنر نے کہا کہ سابق فوجیوں کی جرأت صرف میدانِ جنگ تک محدود نہیں بلکہ امن کے قیام اور قوم کی ترقی کو یقینی بنانے میں بھی جھلکتی ہے۔ انہوں نے کہا کہ ہمارے سابق فوجی اور بہادر سپاہی ہمیشہ دوسروں کی حفاظت کو اپنی جان پر فوقیت دیتے ہیں اور فوج کی جرأت و قربانی ہی ملک کی سلامتی کی ریڑھ کی ہڈی ہے۔
سنہا نے کہا، ’’ہمارے فوجیوں کی قربانیاں اکثر نظر نہیں آتیں۔ جب قوم سکون کی نیند سوتی ہے تو وہ چوکس کھڑے ہوتے ہیں۔ جب قوم تہوار مناتی ہے تو ہمارے سپاہی گھر سے دور سرحدوں کی حفاظت کرتے ہیں۔ وہ قربانیوں کا چرچا نہیں کرتے، بلکہ ہر لمحہ اسے جیتے ہیں۔‘‘
لیفٹیننٹ گورنر نے کہا کہ سابق فوجی نوجوانوں کے لیے زندہ رول ماڈل ہیں، جو کردار، دائمی اقدار اور بے لوث خدمت کے ذریعے قوم کی رہنمائی کرتے ہیں۔ انہوں نے مزید کہا کہ وطن کی حفاظت سے لے کر سماج کی خدمت تک، مسلح افواج کے سابق اہلکار مسلسل بھارت کے مستقبل کی تشکیل میں اپنا کردار ادا کر رہے ہیں۔
تقریب کے دوران لیفٹیننٹ گورنر نے ’’وال آف فیم‘‘ کا افتتاح کیا اور سابق فوجیوں کے لیے ایک خصوصی پولیس ہیلپ لائن سروس کا آغاز بھی کیا۔ انہوں نے وزیر اعظم نریندر مودی کی قیادت میں سابق فوجیوں اور ان کے خاندانوں کی فلاح و بہبود کے لیے حکومت کے عزم کا اعادہ کیا۔
سنہا نے کہا، ’’سابق فوجیوں کی خدمات کا خیال اور احترام میرا عہد ہے۔ ہم نہ صرف ان کے اہلِ خانہ کی فلاح کے لیے پُرعزم ہیں بلکہ ان بہادر سپاہیوں کے لیے باعزت زندگی یقینی بنانے کے لیے بھی کوشاں ہیں جنہوں نے قوم کے لیے خدمت اور قربانی دی۔‘‘
لیفٹیننٹ گورنر نے بھارتی فوج کے پہلے کمانڈر اِن چیف فیلڈ مارشل کے ایم کریاپا کو خراجِ عقیدت پیش کیا۔ اس کے علاوہ انہوں نے سیکنڈ لیفٹیننٹ رام راغوبا رانے، بریگیڈیئر محمد عثمان، نائک جدو ناتھ سنگھ اور راجوری کے دیگر بہادر سپوتوں کو بھی یاد کیا۔
اس موقع پر ایک عظیم الشان سابق فوجیوں کی ریلی کا اہتمام کیا گیا۔ سابق فوجیوں اور ویر ناریوں میں موٹرائزڈ وہیل چیئرز، ریٹروفٹڈ اسکوٹیز اور دیگر معاون آلات بھی تقسیم کیے گئے۔
اس کے علاوہ ایم ایل ایز افتخار احمد، ٹھاکر رندھیر سنگھ اور دیویانی رانا، ڈی آئی جی راجوری پونچھ رینج تجندر سنگھ، ڈپٹی کمشنر راجوری ابھیشیک شرما، ایس ایس پی راجوری گورو سِکرور اور سکیورٹی فورسز، سول و پولیس انتظامیہ کے سینئر افسران بھی موجود تھے اور انہوں نے سابق فوجیوں اور ویر ناریوں کو خراجِ عقیدت پیش کیا۔