عدالت نے آسیہ اندرابی کو یو اے پی اے کیس میں قصوروار قرار دے دیا

نئی دہلی: دہلی کی ایک عدالت نے بدھ کے روز کشمیری علیحدگی پسند رہنما اور دخترانِ ملت کی سربراہ آسیہ اندرابی کو غیر قانونی سرگرمیاں (انسداد) قانون(یو اے پی اے)کے تحت درج ایک مقدمے میں قصوروار قرار دے دیا۔
ایڈیشنل سیشنز جج چندرجیت سنگھ نے آسیہ اندرابی کو یو اے پی اے کی دفعہ۱۸(سازش کی سزا) اور دفعہ۳۸(دہشت گرد تنظیم کی رکنیت سے متعلق جرم) کے تحت مجرم ٹھہرایا۔ عدالت نے واضح کیا کہ سزا کی مدت کا فیصلہ۱۷جنوری کو سنایا جائے گا۔
آسیہ اندرابی کے خلاف نیشنل انویسٹی گیشن ایجنسی (این آئی اے) نے نفرت انگیز تقاریر کے ذریعے بھارت کے خلاف جنگ چھیڑنے، مجرمانہ سازش اور یو اے پی اے کے تحت مقدمہ درج کیا تھا۔ اس کیس میں ان کے دو ساتھی بھی ملزم تھے۔
واضح رہے کہ آسیہ اندرابی نے۱۹۸۷میں خواتین پر مشتمل علیحدگی پسند تنظیم دخترانِ ملت کی بنیاد رکھی تھی۔ انہیں اپریل۲۰۱۸میں گرفتار کیا گیا تھا، جس کے بعد اس تنظیم پر پابندی عائد کر دی گئی تھی۔
عدالت کے فیصلے کے بعد اس معاملے پر مزید پیش رفت سزا کے اعلان کے ساتھ متوقع ہے۔