بجٹ اجلاس۲۸جنوری سے متوقع‘عام بجٹ یکم فروری کو پیش کیا جائے گا

نئی دہلی: پارلیمنٹ کا بجٹ اجلاس۲۸جنوری سے شروع ہونے کا امکان ہے جبکہ مرکزی بجٹ یکم فروری، اتوار کو پیش کیا جائے گا۔
کابینہ کمیٹی برائے پارلیمانی امور کی جانب سے طے کیے گئے مجوزہ شیڈول کا حوالہ دیتے ہوئے حکام نے جمعہ کو بتایا کہ صدر جمہوریہ دروپدی مرمو۲۸جنوری کو پارلیمنٹ کے دونوں ایوانوں کے مشترکہ اجلاس سے خطاب کریں گی۔
صدر کا روایتی خطاب ہر سال پارلیمنٹ کے پہلے اجلاس کے پہلے دن ہوتا ہے۔۲۹جنوری کو بیٹنگ ریٹریٹ تقریب کے باعث دونوں ایوانوں کا اجلاس نہیں ہوگا۔۳۰جنوری کو پارلیمنٹ کا اجلاس ہوگا، جس دن اقتصادی سروے پیش کیے جانے کا امکان ہے۔
۳۱ جنوری کو لوک سبھا اور راجیہ سبھا کا اجلاس نہیں ہوگا۔مرکزی بجٹ یکم فروری، اتوار کو پیش کیا جائے گا۔
صدر کے خطاب پر شکریہ کی تحریک اور بجٹ پر بحث کے بعد پارلیمنٹ۱۳فروری کو تقریباً ایک ماہ کے وقفے کے لیے ملتوی ہو جائے گی۔
پارلیمنٹ دوبارہ ۹مارچ کو اجلاس کرے گی اور یہ اجلاس۲؍اپریل، جمعرات کو اختتام پذیر ہوگا۔
عام طور پر پارلیمنٹ کا اجلاس جمعہ کو ملتوی کیا جاتا ہے، تاہم۳؍اپریل کو گڈ فرائیڈے اور اس کے بعد ویک اینڈ کے پیش نظر اجلاس۲؍اپریل کو ختم کیے جانے کا امکان ہے، حکام نے بتایا۔