وزیر اعظم نریندر کی قیادت میں ایک ترقی یافتہ قوم کی تعمیر کی جانب ایک انقلابی سفر کا آغاز ہو چکا ہے:نائب صدر
سرینگر: نائب صدر ‘سی پی رادھا کرشنن نے پیر کے روز کہا کہ آپریشن سندور کے ذریعے مسلح افواج نے بھارت کا سر فخر سے بلند کیا اور دنیا کو یہ واضح پیغام دیا کہ بھارت اپنے عزم پر ثابت قدم ہے، جب کہ اس فوجی کارروائی کو کامیابی کے ساتھ انجام دیا گیا۔
دہلی کینٹ میں نیشنل کیڈٹ کور (این سی سی) کے یومِ جمہوریہ کیمپ سے خطاب کرتے ہوئے انہوں نے آپریشن کے دوران این سی سی کے کردار کی بھی ستائش کی۔
کرشنن نے کہا ’’آپریشن سندور کے دوران این سی سی نے قابلِ ستائش خدمات انجام دیں، جب تقریباً۷۲ہزار این سی سی کیڈٹس نے رضاکارانہ طور پر ‘این سی سی واریئرز’ بن کر شہری دفاع کے اقدامات میں حصہ لیا۔‘‘
حکام کے مطابق ان کیڈٹس نے ہنگامی مشقوں، خون کے عطیہ کیمپوں اور دیگر شہری دفاع سے متعلق سرگرمیوں میں تعاون کیا۔
آپریشن سندور بھارتی مسلح افواج نے۷مئی۲۰۲۵کی علی الصبح انجام دیا، جس کے نتیجے میں کم از کم۱۰۰دہشت گردوں کو ہلاک کیا گیا۔ یہ کارروائی پہلگام میں ہونے والے ہولناک دہشت گرد حملے کے جواب میں کی گئی، جس میں۲۶بے گناہ شہری جان سے ہاتھ دھو بیٹھے تھے۔
نائب صدر نے کہا ’’گزشتہ سال ہماری مسلح افواج نے ملک کو فخر کا موقع دیا، جب انہوں نے آپریشن سندور کو کامیابی سے انجام دے کر دنیا کو بھارت کے عزم و استقلال کا مظاہرہ کر کے دکھایا۔‘‘
کرشنن نے مزید کہا، ’’آپریشن سندور قوم کے وقار، خودمختاری اور شہریوں کے تحفظ کے لیے بھارتی مسلح افواج کے غیر متزلزل عزم کی ایک طاقتور علامت ہے‘‘۔
نائب صدر رادھا کرشنن نے پیر کے روز باضابطہ طور پر این سی سی کے یومِ جمہوریہ کیمپ کا افتتاح کیا، جو۲۸جنوری کو وزیراعظم ریلی کے ساتھ اختتام پذیر ہوگا۔
ملک بھر سے۲۴۰۶ی؍۱ین سی سی کیڈٹس، جن میں۸۹۸لڑکیاں شامل ہیں، اس تقریباً ایک ماہ طویل کیمپ میں شرکت کر رہے ہیں۔
اپنے خطاب میں نائب صدر نے کیڈٹس کو ’’نہ صرف یومِ جمہوریہ کیمپ کے شرکاء بلکہ نئے بھارت کے سفیر‘‘ قرار دیا، جو۲۰۴۷تک ایک ‘آتم نربھر’ اور مضبوط بھارت، یعنی ایک ترقی یافتہ بھارت (وکست بھارت) کی تشکیل میں اپنا کردار ادا کریں گے۔انہوں نے کہا ’’آپ میں سے ہر ایک میں مجھے ایک ترقی یافتہ، ہمہ گیر اور پُراعتماد بھارت کی مضبوط بنیاد نظر آتی ہے۔‘‘
کرشنن نے کہا کہ وزیر اعظم نریندر مودی کی قیادت میں ایک ترقی یافتہ قوم کی تعمیر کی جانب ایک انقلابی سفر کا آغاز ہو چکا ہے، اور اس کے مرکز میں ‘آتم نربھرتا’ یعنی خود انحصاری کا جذبہ ہے، جو باصلاحیت، منضبط اور اقدار سے جڑی نوجوان نسل کی طاقت سے پروان چڑھ رہا ہے۔
نائب صدر نے کہا، ’’آج کے تیزی سے بدلتے عالمی ماحول میں بھارت کو ایسے نوجوانوں کی ضرورت ہے جو بہادر بھی ہوں اور ہمدرد بھی، تکنیکی طور پر ماہر ہوں مگر مضبوط اقدار سے جڑے ہوں، جو چیلنجز کا سامنا حوصلے سے کریں اور مواقع سے اعتماد کے ساتھ فائدہ اٹھائیں۔‘‘
انہوں نے این سی سی کیڈٹس سے کہا کہ وہ اتحاد اور نظم و ضبط کے ساتھ قوم کی خدمت کے جذبے کے ذریعے عوام میں امید اور اعتماد پیدا کرتے ہیں۔
اپنے خطاب میں نائب صدر نے این سی سی کی تعریف کرتے ہوئے کہا کہ اپنی ’’مسلسل مہمات اور اقدامات‘‘ کے ذریعے یہ ادارہ نوجوانوں کی تربیت اور قومی ترقی کے ایک نئے دور میں داخل ہو رہا ہے۔
کرشنن نے این سی سی یومِ جمہوریہ کیمپ کو نوجوانوں پر بھارت کے اعتماد اور ایک مضبوط و متحد قوم کی تعمیر کے اجتماعی عزم کی طاقتور علامت قرار دیا۔
این سی سی کے شعار ’’اتحاد اور نظم و ضبط‘‘ کو اجاگر کرتے ہوئے نائب صدر نے کہا کہ یہ تنظیم بااعتماد اور اقدار پر مبنی نوجوانوں کی تشکیل جاری رکھے ہوئے ہے، جو وکست بھارت کے وژن کی ریڑھ کی ہڈی ہیں۔
نائب صدر نے کہا کہ این سی سی کا یومِ جمہوریہ کیمپ آئینی اقدار—انصاف، آزادی، مساوات اور اخوت—کی عکاسی کرتا ہے، جہاں مختلف ریاستوں اور مرکز کے زیر انتظام علاقوں سے آئے کیڈٹس ایک ساتھ رہتے اور تربیت حاصل کرتے ہیں، اور قومی یکجہتی کے جذبے کو مجسم شکل دیتے ہیں۔
کرشنن نے مہم جوئی کی سرگرمیوں، بین الاقوامی نوجوان تبادلہ پروگراموں، ماحولیاتی اقدامات اور آفات سے نمٹنے کی کوششوں میں کیڈٹس کی شاندار کارکردگی کی تعریف کی، جن میں کیرالہ کے وایناڈ میں سیلاب کے دوران انجام دی گئی خدمات بھی شامل ہیں۔
این سی سی کی تربیت کے جدید نظام، بشمول سائبر اور ڈرون تربیت کے آغاز اور ریموٹ پائلٹ ٹریننگ اکیڈمی کے قیام کا خیرمقدم کرتے ہوئے نائب صدر نے کہا کہ ایسے اقدامات نوجوانوں کو ابھرتے ہوئے تکنیکی اور سکیورٹی چیلنجز سے نمٹنے کے لیے تیار کریں گے۔
انہوں نے کیمپ میں شریک کیڈٹس پر زور دیا کہ وہ خدمت، نظم و ضبط اور حب الوطنی کے اعلیٰ ترین اصولوں کو برقرار رکھیں۔
اس سے قبل، کیمپ پہنچنے پر نائب صدر کو این سی سی کیڈٹس کی جانب سے گارڈ آف آنر پیش کیا گیا۔انہوں نے این سی سی ہال آف فیم کا دورہ بھی کیا، جہاں انہیں این سی سی کی تاریخ، کامیابیوں اور ارتقا کے بارے میں بریفنگ دی گئی۔
کرشنن نے نمائش کے اسٹالز کا بھی معائنہ کیا، جن میں یووا آپدا متر اسکیم اور ڈرون تربیت جیسے اقدامات کو اجاگر کیا گیا تھا، اور آفات سے نمٹنے اور جدید ٹیکنالوجی کو اپنانے کے لیے تنظیم کی کوششوں کو سراہا۔
کیڈٹس کی جانب سے ایک ثقافتی پروگرام بھی پیش کیا گیا۔ بعد ازاں نائب صدر نے ان سے ملاقات کی اور ان کے نظم و ضبط، جوش و خروش اور قومی فخر کے جذبے کی تعریف کی۔
اس موقع پر این سی سی کے ڈائریکٹر جنرل لیفٹیننٹ جنرل وریندر واتس اور دیگر سینئر عہدیداران بھی موجود تھے۔ (ایجنسیاں)
