بی بی ایل : سڈنی سکسرز نے برسبین ہیٹ کو دھول چٹا دی، بابر اعظم ناکام

برسبین،5 جنوری (یو این آئی ) بگ بیش ٹی 20 لیگ کے 24ویں معرکے میں سڈنی سکسرز نے لو اسکورنگ مگر سنسنی خیز مقابلے کے بعد برسبین ہیٹ کو 3 وکٹوں سے شکست دے دی۔ کوفس ہاربر کے میدان پر بالرز کا راج رہا، جہاں بلے باز رنز بنانے کے لیے جدوجہد کرتے نظر آئے۔ٹاس جیت کر پہلے بیٹنگ کرنے والی برسبین ہیٹ کی ٹیم سڈنی سکسرز کے بالرز کے سامنے بے بس دکھائی دی۔ مقررہ 20 اوورز میں برسبین کی پوری ٹیم 9 وکٹوں کے نقصان پر صرف 114 رنز ہی بنا سکی۔
سڈنی سکسرز کی جانب سے شان ایبٹ، جوئیل ڈیوس اور بین وارشوس نے 2، 2 شکار کر کے برسبین کی بیٹنگ لائن کی کمر توڑ دی۔115 رنز کا بظاہر آسان ہدف تعاقب کے دوران سڈنی سکسرز کے لیے بھی امتحان بن گیا۔ اسٹار پاکستانی بلے باز بابر اعظم صرف 2 رنز بنا کر پویلین لوٹ گئے، جس سے اسٹیڈیم میں موجود شائقین کو بڑا جھٹکا لگا۔
تاہم، سڈنی کے مڈل آرڈر نے ہمت نہ ہاری ،جوئیل ڈیوس نے 35 رنز کی ذمہ دارانہ اننگز کھیل کر ٹیم کو سہارا دیا۔
ہیڈن کیئر کے برق رفتار 27 رنز نے جیت کی راہ ہموار کی۔
سڈنی سکسرز نے مطلوبہ ہدف 18.4 اوورز میں 7 وکٹوں کے نقصان پر حاصل کر کے پوائنٹس ٹیبل پر اپنی پوزیشن مستحکم کر لی۔ برسبین کی جانب سے میتھیو کونی مان اور اولی پیٹرسن نے 2، 2 وکٹیں حاصل کیں مگر وہ اپنی ٹیم کو شکست سے نہ بچا سکے۔