جوکووچ نے سخت مقابلے میں ہمبرٹ کو شکست دی، ٹورین کی دوڑ میں برقرار

باسل، 29 اکتوبر (یواین آئی) نوواک جوکووچ نے سوئس انڈورز باسل میں شاندار واپسی کرتے ہوئے فرانس کے بائیں ہاتھ کے کھلاڑی یوگو ہمبرٹ کو سخت مقابلے میں 4-6، 6-3، 6-4 سے شکست دے دی۔ 2011 کے بعد پہلی بار اس اے ٹی پی 500 ٹورنامنٹ میں کھیل رہے جوکووچ نے پہلے سیٹ میں پچھڑنے کے بعد زبردست واپسی کی۔
39 سالہ جوکووچ کی یہ جیت 2 گھنٹے 26 منٹ تک جاری رہنے والے مقابلے میں حاصل ہوئی اور اس نے اے ٹی پی فائنلز، ٹورین کے لیے ان کی کوالیفائی کرنے کی امیدیں برقرار رکھی ہیں۔ جوکووچ ‘اے ٹی پی لائیو ریس ٹو ٹورین میں 11ویں نمبر پر ہیں اور نویں نمبر پر موجود رافیل جوڈر سے 319 پوائنٹس پیچھے ہیں۔
جوکووچ نے کہا کہ ہمبرٹ نے آغاز ہی سے جارحانہ کھیل پیش کرتے ہوئے ان پر دباؤ بنایا، لیکن دوسرے سیٹ کے آغاز میں انہیں اپنی ردھم مل گئی۔ پہلے سیٹ میں ہمبرٹ کے طاقتور بائیں ہاتھ کے فورہینڈ اور تیز گراؤنڈ اسٹروکس نے جوکووچ کو خاصا پریشان کیا، تاہم سربیا کے کھلاڑی نے بتدریج مقابلے میں واپسی کی اور دوسرے سیٹ میں ہمبرٹ کی سروس توڑ کر برتری حاصل کرلی۔
دوسرے سیٹ میں 1-4 سے پیچھے رہنے کے دوران ہمبرٹ نے کمر کے نچلے حصے کے علاج کے لیے میڈیکل ٹائم آؤٹ لیا، لیکن جوکووچ اس وقت تک اپنی گرفت مضبوط کرچکے تھے۔ انہوں نے دفاعی انداز میں کورٹ کے کافی پیچھے سے کھیلتے ہوئے مسلسل پوائنٹس حاصل کیے اور فرانسیسی کھلاڑیوں کے خلاف اپنی مسلسل 33ویں جیت کی جانب قدم بڑھایا۔
بیجنگ میں رواں ماہ اے ٹی پی 500 ٹورنامنٹ جیتنے والے جوکووچ کی یہ اس سال ٹور لیول پر 20ویں کامیابی ہے اور وہ مسلسل 21ویں سیزن میں کم از کم 20 ٹور لیول میچ جیتنے میں کامیاب رہے ہیں۔ باسل میں انہوں نے وائلڈ کارڈ کے ذریعے شرکت کی ہے، جہاں وہ 2009 میں اپنے پہلے ہی شرکت میں خطاب جیت چکے ہیں۔ اب ان کا سامنا جرمنی کے جان لینارڈ اسٹرف سے ہوگا، جنہوں نے یانک ہانفمان کو 6-4، 6-3 سے شکست دی۔ جوکووچ کا اسٹرف کے خلاف اے ٹی پی ہیڈ ٹو ہیڈ ریکارڈ 8-0 ہے۔
اگر جوکووچ اسٹرف کو شکست دیتے ہیں تو کوارٹر فائنل میں ان کا مقابلہ پرتگال کے نونو بورجیس سے ہوسکتا ہے، جنہوں نے بدھ کو کاسپر روڈ کو 1-6، 6-3، 6-4 سے شکست دی۔ دیگر مقابلوں میں ڈینس شاپووالوف نے سوئس کوالیفائر ریمی برٹولا کو 6-4، 6-2 سے شکست دی اور اب دوسرے دور میں ان کا سامنا چھٹی سیڈ ٹیلر فرٹز سے ہوگا۔