’ جموں کے عوام کی ناقابلِ تسخیر روح نے کئی نسلوں سے جموں و کشمیر کے مکمل انضمام کی شمع کو روشن رکھا ہے‘
جموں/۳۰ دسمبر
لیفٹیننٹ گورنر ‘منوج سنہا نے منگل کے روز جے ڈی اے پارک، رام وہار جموں میں ترنگا لہرایا اور نیتاجی سبھاش چندر بوس فلیگ پوائنٹ کا افتتاح کیا۔
یہ تقریب ۱۹۴۳ میں انڈمان و نکوبار جزائر میں نیتاجی سبھاش چندر بوس کی جانب سے بھارتی سرزمین پر ترنگا لہرانے کی ۸۲ویں سالگرہ کے موقع پر منعقد کی گئی۔
۳۰دسمبر۱۹۴۳ کو نیتاجی نے پورٹ بلیئر کو برطانوی اقتدار سے آزاد قرار دیا تھا اور تمام ہم وطنوں کو آزادی کے عزم سے سرشار کیا تھا۔ آج کی یہ پہل آزادی کی جدوجہد میں نیتاجی کی شاندار خدمات کو یاد کرنے کیلئے کی گئی ہے۔
نیتاجی سبھاش چندر بوس کو خراجِ عقیدت پیش کرتے ہوئے لیفٹیننٹ گورنر نے کہا کہ نیتاجی کی جانب سے دیا گیا نعرہ ’جے ہند‘ قومی شجاعت کی علامت بنا ہوا ہے، جس نے ایک زمانے میں آزاد ہند فوج کو متحد رکھا اور آج بھی ۱۴۰کروڑ ہندوستانیوں کو متاثر کر رہا ہے۔
لیفٹیننٹ گورنر نے کہا’’نیتاجی سبھاش چندر بوس کی حب الوطنی بے مثال تھی۔ ان کی غیر معمولی جرات نے بھارت کو ایک اہم منتر دیا کہ مستقبل کی تعمیر صرف اتحاد کی بنیاد پر ہی ممکن ہے۔ وہ اس بات پر یقین رکھتے تھے کہ تقسیم شدہ معاشرہ کبھی بھی ایک پائیدار مستقبل تعمیر نہیں کر سکتا۔ سوراج کے لیے نیتاجی کی وکالت، نوجوانوں اور خواتین کو بااختیار بنانے کی ان کی کوششیں، ان کی اقتصادی پالیسی اور صنعتی ترقی اور چھوٹی صنعتوں کے فروغ پر زور نے آج کے خود کفیل بھارت کی بنیاد رکھنے میں اہم کردار ادا کیا ہے‘‘۔
سنہا نے وزیر اعظم نریندر مودی کا شکریہ ادا کیا کہ انہوں نے نیتاجی کے ورثے کو تاریخ میں اس کا جائز مقام دلانے کو یقینی بنایا۔
لیفٹیننٹ گورنر نے کہا کہ جموں بھارت کی قومی یکجہتی اور ایک اٹوٹ ثقافتی دھارے کی علامت ہے۔ انہوں نے کہا کہ جموں کے عوام کی ناقابلِ تسخیر روح نے کئی نسلوں سے جموں و کشمیر کے مکمل انضمام کی شمع کو روشن رکھا ہے۔
سنہا نے کہا’’ہماری یکجہتی ہی ہماری طاقت ہے اور کامیابی کیلئے نہایت ضروری ہے۔ ہمیں متحد رہنا چاہیے اور اپنی مشترکہ وراثت اور مشترکہ اقدار کا تحفظ کرنا چاہیے‘‘۔
لیفٹیننٹ گورنر نے جموں میونسپل کارپوریشن، جموں ڈیولپمنٹ اتھارٹی، محکمہ ہاؤسنگ و اربن ڈیولپمنٹ اور ضلع انتظامیہ کی مشترکہ کوششوں کو سراہا، جنہوں نے نیتاجی کے ورثے کو خراجِ عقیدت پیش کیا۔ انہوں نے ہر سال ۳۰ دسمبر کو باقاعدگی سے یادگاری تقریبات منعقد کرنے پر بھی زور دیا۔
اس موقع پر لیفٹیننٹ گورنر نے نیتاجی سبھاش چندر بوس کی زندگی پر مبنی فوٹو گیلری کا بھی دورہ کیا۔ نیتاجی کی قیادت اور بھارت کی آزادی میں ان کے کلیدی کردار پر ایک دستاویزی فلم بھی دکھائی گئی۔
تقریب میں شمل لال شرما اور اروند گپتا، اراکین قانون ساز اسمبلی؛ مندِیپ کور، کمشنر سیکریٹری محکمہ ہاؤسنگ و اربن ڈیولپمنٹ؛ رمیش کمار، ڈویڑنل کمشنر جموں؛ بھیم سین ٹوٹی، آئی جی پی جموں زون؛ شیو کمار شرما، ڈی آئی جی جموں-سانبہ-کٹھوعہ رینج؛ ڈاکٹر دیونش یادو، میونسپل کمشنر جموں؛ ڈاکٹر راکیش منہاس، ڈپٹی کمشنر جموں؛ روپیش کمار، وائس چیئرمین جے ڈی اے اور سول و پولیس انتظامیہ کے سینئر افسران موجود تھے۔
پدم پروفیسر وشوامورتی شاستری؛ پدم ڈاکٹر ایس پی ورما، ممتاز شہری اور مختلف شعبہ ہائے زندگی سے تعلق رکھنے والے افراد نے بھی قومی پرچم لہرانے کی تقریب میں شرکت کی۔
ڈی آئی پی آر
