گلمرگ میں نئے سال پر سیاحوں کی سو فیصد بُکنگ

سرینگر/۳۰دسمبر
وادی کشمیر کے عالمی شہرت یافتہ سیاحتی مقام گلمرگ میں نئے سال کی تقریبات سے قبل ہی سیاحوں کی آمد بے حد بڑھ گئی ہے اور ہوٹلوں، گیسٹ ہاؤسز اور ہوم اسٹیٹس میں سو فیصد بُکنگ درج کی گئی ہے ۔ گلمرگ میں موجود تقریباً تمام رہائشی سہولیات۲۷دسمبر سے ہی مکمل طور پر بھری ہوئی ہیں، جس سے اس سال کے سرمائی سیزن کے غیر معمولی رش کا اندازہ لگایا جا سکتا ہے ۔
محکمہ سیاحت کے حکام کے مطابق وادی میں برفباری کے امکانات اور نئے سال کی تقریبات نے گلمرگ میں سیاحوں کا ہجوم بڑھا دیا ہے ۔ محکمے کے ایک اعلیٰ افسر نے بتایا کہ اس سال گلمرگ میں ریکارڈ تعداد میں سیاح پہنچے ہیں۔
اسی دوران سیاحوں کا کہنا ہے کہ گلمرگ کی برفباری، قدرتی حسن اور ایڈونچر سرگرمیاں اسے نئے سال منانے کیلئے بھارت کا سب سے بہترین مقام بناتی ہیں۔
گجرات سے آئے۲۷سالہ سیاح امیت رانا نے بتایا’’میں پہلی بار کشمیر آیا ہوں اور گلمرگ بالکل خواب جیسا ہے ۔ ہم نے نئی سال کی رات یہاں گزارنے کے لیے دو ماہ پہلے ہی بکنگ کر لی تھی۔ یہاں کی فضا، برف اور مہمان نوازی بے مثال ہے ‘‘۔
نوجوان سیاحوں کے ساتھ ساتھ خاندان بھی بڑی تعداد میں گلمرگ پہنچے ہیں۔ دہلی سے آنے والی ثمن فاطمہ نے کہا’’میرے بچے پہلی بار اسکیئنگ ٹرائی کر رہے ہیں۔ نئے سال پر کشمیر آنے کا تجربہ یادگار ہے ۔ ہمیں کہیں بھی زیادہ رش یا بدنظمی نظر نہیں آئی، سب کچھ منظم لگ رہا ہے ‘‘۔
محکمہ سیاحت نے بھی نئے سال کی تقریبات کے پیش نظر گلمرگ میں اضافی سہولیات اور سکیورٹی انتظامات کا بندوبست کیا ہے ۔ حکام کے مطابق اس سال گلمرگ میں۱۴روزہ اسکیئنگ ٹریننگ پروگرام اور دیگر ونٹر اسپورٹس سرگرمیوں پر خاص توجہ دی جا رہی ہے تاکہ سیاحوں کو مکمل سرمائی تجربہ فراہم کیا جا سکے ۔
گلمرگ کے مقامی ٹور آپریٹرز اور برفانی کھیلوں سے وابستہ نوجوانوں کے مطابق رش بڑھنے سے ان کی آمدنی میں بھی نمایاں اضافہ ہوا ہے ۔
دوسری جانب محکمہ سیاحت نے سیاحوں سے اپیل کی ہے کہ وہ وادی کے دوسرے مقامات-جیسے سونہ مرگ، دودھ پتھری اور پہلگام،کا بھی رخ کریں تاکہ وادی کے سرمائی پیکیج سے بھرپور لطف اٹھا سکیں۔
مجموعی طور پر گلمرگ اس وقت جشنِ نو سال میں ڈوبا ہوا ہے ۔ برف سے ڈھکی ڈھلوانوں، اسکیئنگ کے جوش اور سیاحوں کے بے پناہ ہجوم نے اس سرمائی مقام کو ایک بار پھر ملک کا ونٹر ٹورزم کیپٹل بنا دیا ہے ۔ایجنسیز