کرسمس اور نئے سال کی تقریبات کے پیش نظر سری نگر بھر میں سکیورٹی انتظامات مزید سخت کر دیے گئے ہیں:حکام
سرینگر۲۳ دسمبر
منگل کے روز سری نگر شہر میں سکیورٹی فورسز نے اہم تنصیبات کے اطراف اینٹی سبوتاڑ کارروائیاں انجام دیں، جن کا مقصد سکیورٹی اقدامات کو مضبوط بنانا اور کسی بھی ممکنہ خطرے سے نمٹنا تھا۔
سرینگر پولیس کے ایک ترجمان نے بتایا’’پولیس نے سینٹرل ریزرو پولیس فورس (سی آر پی ایف) کے ساتھ قریبی تال میل کے تحت سری نگر کے نارتھ زون میں واقع اہم اور حساس تنصیبات کے اطراف ایریا سکیورٹی/اینٹی سبوتاڑ (اے ایس ٹی) کارروائیاں انجام دیں، جن کا مقصد احتیاطی سکیورٹی اقدامات کو مضبوط بنانا اور ممکنہ خطرات کا تدارک کرنا تھا‘‘۔
ترجمان نے کہا کہ اس مشترکہ سکیورٹی مشق کا مقصد مجموعی سکیورٹی گرڈ کو مزید مستحکم کرنا، آپریشنل تیاریوں کو بہتر بنانا، اور اہم انفراسٹرکچر کے ساتھ ساتھ عام عوام کی جان و مال کے تحفظ کو یقینی بنانا ہے۔
پولیس ترجمان کے مطابق’’کارروائی کے دوران نشاندہی شدہ علاقوں کی مکمل جانچ اور سینیٹائزیشن کی گئی، جبکہ موجودہ سکیورٹی انتظامات کا بھی جامع جائزہ لیا گیا‘‘۔
اسی نوعیت کی سکیورٹی مشقیں ضلع اننت ناگ کے بعض علاقوں میں بھی انجام دی گئی ہیں۔
پولیس نے مہاراجہ بازار اور امیرہ کدل کے علاقوں میں، جو وادی میں یومِ جمہوریہ اور یومِ آزادی کی تقریبات کے مرکزی مقام بکشھی اسٹیڈیم کے آس پاس واقع ہیں، اینٹی سبوتاڑ کارروائیاں انجام دی تھیں۔
ادھر حکام نے منگل کے روز بتایا کہ آنے والی کرسمس اور نئے سال کی تقریبات کے پیش نظر سری نگر بھر میں سکیورٹی انتظامات مزید سخت کر دیے گئے ہیں۔
پولیس اور سینٹرل ریزرو پولیس فورس (سی آر پی ایف) کے اہلکاروں نے شہر کے مختلف اہم مقامات پر گاڑیوں کی جانچ اور نگرانی میں اضافہ کر دیا ہے، جن میں سیاحتی اور عوامی آمد و رفت کے علاقے، جیسے ڈل جھیل کا علاقہ بھی شامل ہے۔ حکام کے مطابق ان اقدامات کا مقصد کسی بھی ممکنہ سکیورٹی خلاف ورزی کو روکنا اور تہواروں کے دوران مقامی باشندوں اور سیاحوں کی سلامتی کو یقینی بنانا ہے۔
نشاط پولیس اسٹیشن کے پولیس اہلکاروں نے سی آر پی ایف یونٹس کے ہمراہ نمایاں داخلی اور خارجی راستوں پر گاڑیوں کی مکمل جانچ اور نقل و حرکت کی نگرانی کی۔
حکام نے بتایا کہ شہر بھر میں اعلیٰ سطح کی چوکسی برقرار رکھی جا رہی ہے، جس کے تحت گشت میں اضافہ، ناکوں کا قیام اور حساس مقامات پر اضافی اہلکار تعینات کیے گئے ہیں۔ ان کا کہنا تھا کہ توجہ قانون و نظم کو برقرار رکھنے پر مرکوز ہے، تاکہ معمول کی سرگرمیاں بغیر کسی خلل کے جاری رہ سکیں۔
سکیورٹی ایجنسیوں نے عوام سے بھی اپیل کی ہے کہ وہ چیکنگ کے عمل میں تعاون کریں اور کسی بھی مشتبہ سرگرمی کی اطلاع فوری طور پر قریبی پولیس یونٹ کو دیں۔
دریں اثنا جنوبی کشمیر کے ضلع اننت ناگ میں پانزلہ اور سالیہ کے گھنے جنگلات میں سیکورٹی فورسز نے بڑے پیمانے پر تلاشی آپریشن شروع کیا ہے ، جس میں اسپیشل آپریشنز گروپ کی خصوصی ٹیمیں اور سی آر پی ایف کی نفری مشترکہ طور پر حصہ لے رہی ہے ۔
ذرائع نے بتایا کہ علاقے میں مشتبہ نقل و حرکت کی اطلاعات ملنے کے بعد رات گئے فورسز نے جنگلاتی پٹی کو مکمل طور گھیرے میں لیا۔ دشوار گزار جنگلی علاقے کے پیش نظر آپریشن کو انتہائی احتیاط اور جدید ٹیکنالوجی کی مدد سے آگے بڑھایا جا رہا ہے ۔
ذرائع نے بتایا کہ ایس او جی اننت ناگ کی خصوصی ٹیمیں فرنٹ لائن پر ہیں جبکہ سی آر پی ایف کے اہلکار گھیرے کو مضبوط بنانے اور راستوں کی ناکہ بندی میں اہم کردار ادا کر رہے ہیں۔ ڈرون سرویلنس، کھوجی کتے اور ہائی ٹیک آلات کی مدد سے جنگلات کے ہر گوشے کی باریک بینی سے تلاشی لی جا رہی ہے ۔
فورسز نے علاقے کے داخلی و خارجی راستوں کو سیل کر دیا ہے تاکہ مشتبہ عناصر کے فرار کے امکانات کو ختم کیا جا سکے ۔ آخری اطلاعات موصول ہونے تک آپریشن جاری تھا۔ (ایجنسیاں)
