سیدہ کدل سرینگر میں منشیات فروش کی جائیداد قرق

سرینگر/۲۳دسمبر
کشمیر میں منشیات کے کاروبار اور اس کے ذریعے حاصل شدہ ناجائز اثاثوں کے خلاف سخت کارروائی جاری رکھتے ہوئے سری نگر پولیس نے آج سلطان محلہ سیدہ کدل میں واقع دو منزلہ رہائشی مکان کو ضبط کرلیا۔ یہ جائیداد تقریباً ایک کروڑ روپے مالیت کی بتائی جارہی ہے ۔
پولیس کے مطابق ضبط شدہ مکان۱۲مرلہ اراضی پر تعمیر ہے اور اس کا مالک نثار احمد بوٹہ ولد محمد شفیع بوٹہ، ساکن سلطان محلہ سیدکدل ہے ۔
مذکورہ شخص پولیس اسٹیشن رعناواری میں درج ایف آئی آر نمبر۲۰۲۲/۳۹میں نامزد ملزم ہے ، جو این ڈی پی ایس ایکٹ کی دفعات۲۹۔۲۰/۸کے تحت منشیات کی غیر قانونی تجارت میں ملوث پایا گیا تھا۔
تحقیقات کے دوران پولیس نے شواہد کی بنیاد پر یہ ثابت کیا کہ یہ جائیداد منشیات کی خرید و فروخت سے حاصل شدہ غیر قانونی کمائی سے تعمیر کی گئی تھی۔ اسی بنا پر پولیس نے این ڈی پی ایس ایکٹ کی دفعہ۶۸؍ایف کے تحت اس اثاثے کو ضبط کرنے کا حکم جاری کیا۔ کارروائی قانون کے تمام تقاضوں کو پورا کرتے ہوئے کی گئی اور اس موقع پر دو خودمختار گواہ بھی موجود تھے ۔
ضبطی حکم کے مطابق جائیداد کے مالک کو ہدایت دی گئی ہے کہ وہ مزید احکامات تک اس مکان کو بیچنے ، لیز پر دینے ، اس میں کوئی تبدیلی کرنے یا کسی بھی تیسرے فریق کو فائدہ پہنچانے سے باز رہے ۔
جموں و کشمیر پولیس نے کہا ہے کہ منشیات کے کاروبار میں ملوث عناصر کے مالی نیٹ ورکس کو تباہ کرنا ان کی حکمتِ عملی کا اہم حصہ ہے ، اور ایسے عناصر کے خلاف سخت ترین قانونی کارروائی جاری رہے گی۔
پولیس نے عوام سے بھی اپیل کی ہے کہ منشیات کے کاروبار کے خلاف جاری مہم میں تعاون کریں اور مشتبہ سرگرمیوں کی فوری طور پر اطلاع دیں۔ایجنسیز