جعلی فضائی ٹکٹ پر سفر کی کوشش سرینگر ہوائی اڈے پر شہری حراست میں

بڈگام سے تعلق رکھنے والے ایک شہری کو جمعہ کے روز سری نگر انٹرنیشنل ایئرپورٹ پر اس وقت حراست میں لے لیا گیا جب حکام نے اسے جعلی فضائی ٹکٹ پر دہلی کا سفر کرنے کی کوشش کرتے ہوئے پکڑ لیا۔
حکام نے معمول کی جانچ کے دوران ایئرپورٹ کے ڈراپ گیٹ پر گاؤں بگرو، عری گام بڈگام کے رہائشی سید خورشید احمد کو روکا۔
ایئرپورٹ حکام کے مطابق تصدیق کے دوران مسافر کی جانب سے پیش کیا گیا ٹکٹ جعلی پایا گیا۔ پوچھ گچھ کے دوران احمد نے اعتراف کیا کہ ٹکٹ جعلی تھا۔
اعتراف کے بعد مسافر کو اس کے موبائل فون اور اس گاڑی سمیت، جس میں وہ ایئرپورٹ پہنچا تھا‘ٹاٹا سومو مزید تفتیش کیلئے پولیس پوسٹ ہمہما کے حوالے کر دیا گیا۔
اس کے ساتھیوں کو بھی پوچھ گچھ کیلئے پولیس حراست میں لیا گیا ہے۔
پولیس کے مطابق اس معاملے میں ایک مقدمہ درج کر لیا گیا ہے اور یہ جانچ کی جا رہی ہے کہ جعلی ٹکٹ کس طرح حاصل کیا گیا اور آیا اس نیٹ ورک میں مزید افراد بھی ملوث ہیں یا نہیں۔