سی بی آئی نے سرمایہ کاری فراڈ کیس میں چارج شیٹ داخل کی، چینی شہری بھی شامل

نئی دہلی، 10 دسمبر (یو این آئی) مرکزی تفتیشی بیورو (سی بی آئی) نے ایچ پی زیڈ ٹوکن سرمایہ کاری فراڈ کیس میں چارج شیٹ داخل کی ہے ، جس میں ایک چینی شہری کی ملکیت کا ادارہ شیگو ٹیکنالوجی پرائیویٹ لمیٹڈ بھی شامل ہے ۔
سی بی آئی نے بدھ کو کہا کہ ملزمان نے ایچ پی زیڈ ٹوکن’ نامی ایک فرضی موبائل ایپلیکیشن لانچ کی تھی، جس میں دعویٰ کیا گیا تھا کہ سرمایہ کاری کریپٹو کرنسی مائننگ’ کے لیے استعمال کی جائے گی، جس سے بھاری منافع حاصل ہوگا۔ جعلسازوں نے صرف تین ماہ میں کروڑوں روپے کا فراڈ کیا اور پھر یہ رقم کہیں اور منتقل کر دی۔
ایک اہلکار نے کہا، "سی بی آئی کی تحقیقات سے پتہ چلا کہ یہ کوئی ایک واقعہ نہیں تھا، بلکہ غیر ملکی شہریوں کے ذریعے چلائے جانے والے ایک بڑے ، منصوبہ بند سائبر کرائم نیٹ ورک کا حصہ تھا۔ یہ گینگ کووِڈ کے بعد کے عرصے میں قرض کی ایپس، جعلی سرمایہ کاری ایپس اور جعلی آن لائن ملازمت کی پیشکش کرنے والے پلیٹ فارمز کا استعمال کرتے ہوئے ہندوستانی شہریوں کو نشانہ بنانے والے متعدد سائبر گھوٹالوں کے لیے ذمہ دار تھا۔”
سی بی آئی نے ابتدائی طور پر رجنی کوہلی، سوشانت بہیرا، ابھیشیک، محمد امداد حسین، رجت جین اور ڈارٹسے نامی چھ افراد کو گرفتار کیا تھا، لیکن اب 30 ملزمان کے خلاف چارج شیٹ داخل کی ہے ۔ ان میں دو چینی شہری وان جون اور لی اینمنگ بھی شامل ہیں جنہوں نے ان فراڈوں کو منظم کرنے میں کلیدی کردار ادا کیاتھا۔
وان جون جیلین کنسلٹنٹس انڈیا پرائیویٹ لمیٹڈ نامی ایک کمپنی کی ڈائریکٹر تھی، جو چینی ادارے جیلین کنسلٹنٹس کی ذیلی کمپنی تھی۔ وان جون نے ڈارٹسے کی مدد سے شیگو ٹیکنالوجیز سمیت کئی جعلی شیل کمپنیاں کامیابی کے ساتھ بنائیں۔
تحقیقات سے پتہ چلا کہ یہ جعلی کمپنیاں بڑے پیمانے پر منظم سائبر فراڈ کی آمدنی سے بنائی گئی تھیں۔ ان کمپنیوں کے بینک کھاتوں سے روپے سے چند مہینوں میں ہی ایک ہزار کروڑ سے زیادہ کی منتقل کی گئی۔ یہ پورا گینگ بیرون ملک سے ایک منظم نیٹ ورک کے طور پر کام کرتا تھا۔
تحقیقات سے پتہ چلا کہ اس فراڈ میں ایک اپڈیٹڈ ‘پیمنٹ ایگریگیٹر’ کا استعمال کیا گیا تھا۔ کووڈ-19 سے کچھ وقت پہلے ہی ہندستان میں کئی ادائیگیاں ایک پلیٹ فارم پر آنے لگی تھیں اور پیمنٹ ایگریگیٹرز بڑی تعداد میں کمپنیوں کو ادائیگی کی خدمات فراہم کر رہے تھے ، جس سے اس بڑے پیمانے پر منتقلی ممکن ہو رہی تھی۔
جیلین کنسلٹنٹس نے متعدد جعلی کمپنیاں بنانے کے لیے کمپنی کے سیکریٹریز سمیت پیشہ ور افراد کی خدمات حاصل کی تھی۔ اس کے بعد جمع کی گئی رقم کو ملک سے باہر بھیجنے سے پہلے کرپٹو کرنسی میں تبدیل کر دیا جاتا تھا۔
سی بی آئی نے وان جون سمیت تمام ماسٹر مائنڈس کی شناخت کرلی ہے اور 27 ملزمین اور تین کمپنیوں کے خلاف چارج شیٹ داخل کی ہے ۔ اس معاملے میں دیگر مشتبہ افراد کے خلاف مزید تفتیش جاری ہے ۔
سی بی آئی چکر-V جیسی کارروائیوں کے ذریعے ان جدید ترین سائبر فراڈ نیٹ ورکس کو ختم کرنے میں سرگرم عمل ہے ۔