سرینگر/ یکم دسمبر
بارڈر سیکیورٹی فورس کی کشمیر فرنٹیئر نے پیر کے روز کہا کہ فوج کے ساتھ قریبی تال میل میں نہ صرف لائن آف کنٹرول پر ہونے والی ہر دراندازی کی کوشش کو ناکام بنایا گیا بلکہ آپریشن سندور کے تحت ایک انتہائی مؤثر کارروائی بھی انجام دی گئی، جس کے پہلے مرحلے میں مئی کے دوران پاکستانی چوکیاں اور دہشت گرد لانچ پیڈز پر درست نشانہ لگا کر فائر حملے کیے گئے جن سے بھاری نقصان پہنچا۔
سرینگر کے مضافات میں ہمہامہ میں سالانہ پریس کانفرنس سے خطاب کرتے ہوئے آئی جی بی ایس ایف کشمیر فرنٹیئر اشوک یادو نے کہا کہ فورس بھارتی فوج کے ساتھ ہم آہنگی میں کشمیر میں ایل او سی کے۳۴۳ کلومیٹر حصے پر مؤثر طور پر غلبہ رکھے ہوئے ہے۔
یادو نے کہا’’سال کے دوران فورس نے بڑی تعداد میں آپریشنل کامیابیاں حاصل کیں، جو فوج اور دیگر بہن ایجنسیوں کے ساتھ قریبی تال میل اور ہم آہنگی میں انجام دی گئیں۔ بی ایس ایف نے فوج کے ساتھ مل کر ایل او سی پر مؤثر اور بھرپور کنٹرول یقینی بنایا، جس کے نتیجے میں اس سال کشمیر سے ہونے والی تمام دراندازی کی کوششیں ناکام ہوئیں۔
بی ایس ایف کے آئی جی نے بتایا کہ ۲۰۲۵ کے دوران چار کوششوں میں آٹھ درانداز مارے گئے، کیونکہ بی ایس ایف اور فوج کی مشترکہ ٹیموں نے سرحد پر سخت نگرانی برقرار رکھی۔
آپریشن سندور کو اس سال فورس کی سب سے قابلِ ذکر کامیابی قرار دیتے ہوئے یادو نے کہا کہ اس کے پہلے مرحلے میں، جو ۶سے ۱۰ مئی تک جاری رہا، پاکستانی چوکیوں اور دہشت گرد لانچ پیڈز پر مربوط فائر حملے شامل تھے۔
یادو نے کہا’’بی ایس ایف یونٹس نے بھارتی فوج کے ساتھ مل کر ایل او سی کے ساتھ پاکستانی چوکیوں اور دہشت گرد لانچ پیڈز پر فائر حملے مؤثر انداز میں انجام دیے، جس نے مضبوط، درست اور پیشہ ورانہ ردعمل کا مظاہرہ کیا۔ کشمیر فرنٹیئر کی تمام بی ایس ایف یونٹس بشمول اس کے آرٹلری رجمنٹس نے دشمن کی چوکیوں اور بنکروں پر بھاری اور درست گولہ باری اور فائرنگ کی، جس سے پاکستانی فوجیوں کو بھاری جانی نقصان پہنچا، ان کی اگلی چوکیوں کو شدید نقصان ہوا اور بعض دہشت گرد لانچ پیڈز مکمل طور پر تباہ ہو گئے‘‘۔
آئی جی ،بی ایس ایف نے مزید کہا کہ اس کارروائی کو وزیراعظم، وزیر داخلہ، وزیر دفاع اور مختلف سیکیورٹی ایجنسیوں کے سربراہان کی طرف سے اس کی مؤثریت اور دشوار گزار زمینی حالات میں شدید دشمن فائر کے باوجود بہترین انداز میں انجام دہی پر غیر معمولی طور پر سراہا گیا۔
یادو نے کہا کہ پہلگام میں سیاحوں پر دہشت گرد حملے کے بعد بی ایس ایف کی خصوصی تربیت یافتہ ٹیموں کو جموں و کشمیر پولیس کے ساتھ مل کر گل مرگ کے سیاحتی مقام پر تعینات کیا گیا تاکہ اس مقبول سیاحتی مقام کا تحفظ کیا جا سکے۔
بی ایس ایف کے آئی جی نے کہا کہ بی ایس ایف نے اس سال امرناتھ یاترا کو بے حادثہ بنانے میں بھی اہم کردار ادا کیا، اور اننت ناگ، کولگام، سرینگر اور گاندربل اضلاع میں سیکیورٹی فراہم کی۔
سینئر افسر نے بتایا کہ بی ایس ایف نے ایف ڈی ایل (فارورڈ ڈیفنس لوکیشنز) پر دفاع اور بنیادی ڈھانچے کو بہتر بنانے کیلئے بھی بڑی تعداد میں اقدامات کیے ہیں تاکہ جوانوں کو بہتر آپریشنل ماحول اور رہائشی سہولتیں فراہم کی جا سکیں۔
یادو نے کہا’’بی ایس ایف نے نئی نگرانی کے آلات اور ہتھیاروں کوشامل کیا ہے‘جن میں بہتر رات کی نگرانی اور جنگی صلاحیتیں شامل ہیں، تاکہ اس کے جوان ایل او سی اور اندرونی علاقوں میں ابھرتے ہوئے چیلنجوں کیلئے تیار رہیں۔ ایل سی پر غلبے، دراندازی، بی اے ٹی کارروائی اور دشمن کی جارحیت جیسے چیلنجوں پر جوانوں کی تربیت پر خصوصی توجہ دی جا رہی ہے‘‘۔
کشمیر کے عوام کیلئے فورس کے عزم کو دہراتے ہوئے آئی جی نے کہا’’ہم ہمیشہ وادی کے عوام کی خدمت کیلئے یہاں موجود ہیں۔ ان کی حفاظت اور خوش حالی ہماری اولین ترجیح ہے۔ ایجنسیز‘‘
