جموں/۲۹نومبر
جموں کشمیر کے نائب وزیر اعلیٰ سریندر چودھری نے ہفتے کو کہا کہ جموں ڈیولپمنٹ اتھارٹی (جے ڈی اے ) کو اس بات کا جواب دینا ہوگا کہ انہوں نے کس کے حکم پر صحافی ارفاز دینگ کے گھر کو مسمار کیا۔ انہوں نے کہا کہ جو افسر اس میں ملوث ہوگا اس کے خلاف کارروائی ہوگی۔
نائب وزیر اعلیٰ نے ان باتوں کا اظہارجموں میں میڈیا کے ساتھ بات کرنے کے دوران کیا۔
چودھری نے کہا’’میں وزیر اعلیٰ عمر عبداللہ کی جانب سے بات کر رہا ہوں،وزیر اعلیٰ عمر عبداللہ نے کبھی بھی انتقامی کارروائیوں کی حمایت نہیں کی ہے ۔انتظامیہ ملک کے آئین کے مطابق چل رہی ہے اور ہم صحافیوں کے کام کی عزت کرتے ہیں‘‘۔
نائب وزیر اعلیٰ نے کہا’’وزیر اعلیٰ عمر عبداللہ نے بھی کہا کہ حکومت نے ایسا اقدام کرنے کا حکم نہیں دیا تو پھر جے ڈی اے کو واضح کرنا ہوگا کہ انہوں نے ایسا کس کے حکم پر کیا‘‘۔ انہوں نے کہا’’صحافیوں کو خاموش کرنے کی کوئی بھی کوشش جمہوری اداروں کی کمزوری کا باعث بن جاتی ہے ‘‘۔
چودھری کا کہنا تھا’’جے ڈی اے کو جواب دینا ہوگا کہ کس کے کہنے پر ایسا کیا گیا، یہ عمر عبداللہ سرکار کا فیصلہ نہیں ہے ‘‘۔ انہوں نے کہا کہ جو افسر اس میں ملوث ہوگا اس کے خلاف کارروائی ہوگی۔
