جنوری۲۰۲۶ میں کابینہ میں ردوبدل اور توسیع کا امکان

سرینگر/۲۹نومبر
حکمراں نیشنل کانفرنس کی زیر قیادت حکومت جنوری۲۰۲۶ میں کابینہ میں ردوبدل اور توسیع کرنے کا امکان رکھتی ہے۔
باخبر ذرائع نے بتایا کہ وزیر اعلیٰ عمر عبداللہ نے ۲۷؍ اور۲۸ نومبر کو سرینگر میں منعقدہ دو روزہ سینٹرل ورکنگ کمیٹی کے اجلاس کے دوران کابینہ میں ممکنہ توسیع/ردوبدل کے واضح اشارے دیے۔
ذرائع نے کہا ’’میٹنگ کے دوران وزیر اعلیٰ نے پارٹی ساتھیوں سے کہا کہ پارٹی صدر آئندہ ڈیڑھ ماہ کے دوران وزارتی کونسل کی کارکردگی کا جائزہ لیں گے اور پھر اسی کے مطابق فیصلہ کریں گے کہ کن کو برقرار رکھنا ہے اور کنہیں ہٹانا ہے۔‘‘
سی ڈبلیو سی اجلاس کے دوران کئی ارکانِ اسمبلی نے کابینہ میں توسیع کا مطالبہ کیا۔ ان کا کہنا تھا کہ بڑی وزارتی کونسل حکومت کی کارکردگی، رسائی اور پہچان کو بہتر بنانے میں مدد دے گی۔
فی الحال جموں و کشمیر میں کابینہ کی تین نشستیں خالی ہیں، کیونکہ وزارتی کونسل کی زیادہ سے زیادہ تعداد قانون ساز اسمبلی کے کل ارکان کے۱۰ فیصد تک محدود ہے۔ ۹۰ رکنی ایوان میں وزارتی کونسل کی زیادہ سے زیادہ حد نو ہے۔اس وقت وزارتی کونسل میں چھ ارکان شامل ہیں‘وزیر اعلیٰ اور پانچ کابینہ وزراء۔
اگر پانچ نامزد نشستوں کو بھی شامل کر لیا جائے تو بھی وزارتی کونسل کی تعداد نو سے تجاوز نہیں کر سکتی، کیونکہ۵ء۰ کو اضافہ تصور نہیں کیا جاتا جبکہ۵ء۰ سے زیادہ کے اعشاریے کو ایک شمار کیا جاتا ہے۔ایجنسیز