اودھمپور میں مشتبہ نقل و حرکت کی اطلاع کے بعد تلاشی آپریشن شروع

جموں/۲۸نومبر
جموں کشمیر کے اودھمپور ضلع کے پہاڑی علاقوں میں جمعے کے روز اس وقت بڑے پیمانے پر محاصرہ اور تلاشی آپریشن شروع کیا گیا جب سیکورٹی ایجنسیوں کو مشتبہ نقل و حرکت کی اطلاع موصول ہوئی۔
سرکاری ذرائع کے مطابق یہ کارروائی چیگلا،بلوٹھہ بسنت گڑھ بیلٹ میں جاری ہے ۔
افسران نے بتایا کہ فوج، جموں و کشمیر پولیس اور سی آر پی ایف مشترکہ طور پر اس آپریشن میں حصہ لے رہے ہیں۔ بسنت گڑھ ایک ایسا حساس علاقہ ہے جو روایتی دراندازی کے راستے پر واقع ہے اور جہاں سے ماضی میں پاکستان سے آئے دہشت گرد بین الاقوامی سرحد (کٹھوعہ سیکٹر) عبور کر کے پہاڑی راستوں کے ذریعے ڈوڈہ اور کشتواڑ کی جانب بڑھتے ہوئے کشمیر وادی داخل ہونے کی کوشش کرتے رہے ہیں۔
ذرائع کے مطابق اس بیلٹ میں پہلے بھی کئی مقابلے اور دہشت گردی سے متعلق واقعات رونما ہوچکے ہیں، جس کے باعث یہ علاقہ ہمہ وقت سیکورٹی نگرانی میں رہتا ہے ۔
اطلاعات کے مطابق فوج اور پولیس نے تین مشتبہ افراد کی نقل و حرکت کی اطلاع ملنے کے بعد مشترکہ طور پر اس علاقے میں وسیع تلاشی کارروائی شروع کی۔
سیکورٹی فورسز علاقے کی گھنی جنگلاتی پٹی، ندی نالوں اور دشوار گزار راستوں کو بھی کھنگال رہی ہیں تاکہ کسی بھی ممکنہ خطرے کو بروقت روکا جا سکے ۔
تحقیقاتی ایجنسیاں اس اطلاع کی نوعیت کا جائزہ لے رہی ہیں اور علاقے میں مزید کمک بھی روانہ کی گئی ہے ۔ حکام نے کہا کہ آپریشن اس وقت تک جاری رہے گا جب تک علاقے کو مکمل طور پر کلیئر نہ قرار دیا جائے ۔ایجنسیز