سوشل میڈیا پر ذاتی اور توہین آمیز تبصروں سے گریز کریں،تلگودیشم حامیوں سے لوکیش کی اپیل

حیدرآباد 26نومبر(یواین آئی) اے پی کے وزیرآئی ٹی نارا لوکیش نے تلگودیشم پارٹی کے حامیوں سے اپیل کی ہے کہ وہ سوشل میڈیا پر ذاتی اور توہین آمیز تبصروں سے گریز کریں، خاص طور پر اس ویڈیو کے بعد جو آن لائن بڑے پیمانہ پر وائرل ہوئی۔اس پر سخت ردعمل سامنے آیا۔ اس پوسٹ میں ایک اے آئی سے تیار کردہ ویڈیو شامل تھا جس میں سابق وزیراعلیٰ اور وائی ایس آرکانگریس کے سربراہ وائی ایس جگن موہن ریڈی سڑک کنارے ایک پلے کارڈکے ساتھ بیٹھے دکھائی دیئے اور اسے ایک توہین آمیز کیپشن کے ساتھ دوبارہ شیئر کیا گیا۔
لوکیش نے اس پوسٹ کو شیئر کیا اور سیاسی معاملات میں ضبط اور وقار کی ضرورت پر زور دیا۔ انہوں نے کہا "میرے عزیز تلگودیشم خاندان کے لئے ۔ اگرچہ میں ایسے مواد کے پیچھے جذبات کو سمجھتا ہوں، لیکن ذاتی حملے کبھی بھی قابل قبول نہیں ہیں۔ ہم سیاسی حریف ہو سکتے ہیں، لیکن ہمارا عوامی خطاب ہمیشہ وقار اور احترام پر مبنی ہونا چاہیے ۔”
لوکیش نے پارٹی کے کارکنوں اور حامیوں پر زور دیا کہ وہ اس طرح کے پیغامات کو بڑھاوا نہ دیں اور اس کی بجائے تعمیری سیاست کو ترجیح دیں۔ انہوں نے کہا کہ اختلاف رائے تہذیب کے نقصان پر نہیں ہونا چاہیے اور سیاسی ثقافت میں ایسے اقدار شامل ہونے چاہئیں جو آندھرا پردیش کو مضبوط کریں۔