ترنمول لیڈروں سے ملنے پر اعلیٰ انتخابی کمشنر نے رضامندی ظاہر کی

نئی دہلی، 25 نومبر(یو این آئی) اعلیٰ انتخابی کمشنر گیانیش کمار نے مغربی بنگال میں ووٹر فہرست پر خصوصی جامع نظر ثانی (ایس آئی آر) کے معاملے میں بڑھتی ہوئی کشیدگی کے پیشِ نظر ترنمول کانگریس کے لیڈروں سے ملنے پر رضامندی ظاہر کی ہے ۔ یہ ملاقات 28 نومبر کو قبل از دوپہر 11 بجے ہوگی۔
مسٹر کمار نے یہ فیصلہ آئندہ انتخابات سے پہلے سیاسی جماعتوں سے ملاقات کرکے ان کی تشویش دور کرنے کی کوشش کے تحت کیا ہے ۔ قابلِ ذکر ہے کہ وزیر اعلیٰ ممتا بنرجی سمیت کئی سینئر ترنمول رہنماؤں نے ایس آئی آر سے جڑی مبینہ بے ضابطگیوں کو اجاگر کرتے ہوئے انتخابی کمیشن کو کئی بار خطوط لکھے تھے ۔
محترمہ بنرجی نے 24 نومبر کو لکھے اپنے خط میں سوال اٹھایا تھا کہ آیا انتخابی کمیشن ”کسی سیاسی جماعت کی خواہشات کو پورا کرنے کے لیے اس کے اشارے پر کام کر رہا ہے ؟” اس سے قبل وہ 20 نومبر کو بھی خط لکھ کر انتخابی کمیشن سے درخواست کر چکی تھیں کہ ایس آئی آر کو روکا جائے ۔ انہوں نے بوتھ سطح کے افسروں میں بڑھتی کشیدگی اور خودکشی کے واقعات کا بھی حوالہ دیا تھا۔
انتخابی کمشنر نے ترنمول کے ارکان پارلیمان کی تشویش پر سنجیدگی سے غور کرتے ہوئے اس معاملے کو ایک پینل کے سپرد کردیا ہے ، جس کا کام کمیشن اور سیاسی جماعتوں کے درمیان رابطہ بہتر بنانا ہے ۔ مسٹر کمار اور ترنمول لیڈروں کے درمیان ہونے والی ملاقات کا ایجنڈا ابھی واضح نہیں ہے ، لیکن امید ہے کہ ترنمول بی ایل او کی خودکشیوں کے مسئلے کو اٹھائے گی۔ دوسری جانب انتخابی کمیشن انتخابی تیاریوں اور پارٹی سے متعلق تشویش پر گفتگو کر سکتا ہے ۔