نئی دہلی، 25 نومبر (یو این آئی) دہلی کی وزیراعلیٰ ریکھا گپتا نے منگل کے روز کہا کہ ہر شہری تک بہتر، سستی اور مفت صحت سہولیات پہنچانا ان کی حکومت کا بنیادی مقصد ہے ۔
محترمہ ریکھا گپتا نے آج یہاں شکتی نگر سے 70 سے زیادہ ‘آیوشمان آروگیہ مندروں’ کا افتتاح کیا۔ وزیراعلیٰ نے اسے دہلی کی بنیادی صحت خدمات کے نظام کو مضبوط اور جدید بنانے کی سمت ایک انقلابی قدم قرار دیا۔ انہوں نے کہا کہ ان آروگیہ مندروں کے ذریعے مقامی سطح پر شہریوں کو باقاعدہ صحت جانچ، ضروری اور عام ادویات کی مفت فراہمی، حاملہ خواتین اور بچوں کے لیے زچہ و بچہ کی صحت سے متعلق خدمات، لازمی ٹیکہ کاری پروگرام، بیماریوں سے بچاؤ اور صحت سے متعلق مشاورت، اور ماہر ڈاکٹروں سے آن لائن ٹیلی-کونسلنگ جیسی سہولیات ایک ہی جگہ دستیاب ہوں گی۔
انہوں نے کہا کہ وزیراعظم نریندر مودی کی قیادت میں حکومت کا ہدف یہ یقینی بنانا ہے کہ ہر شہری تک بہتر، سستی اور مفت صحت خدمات بلا رکاوٹ پہنچ سکیں۔ آیوشمان بھارت یوجنا، جن اوشدھی کیندر، وے وندنا یوجنا اور اب آروگیہ مندر مل کر دہلی کو جدید طبی سہولیات سے آراستہ کر رہے ہیں۔ حکومت کا پختہ عزم ہے کہ ہر مریض کو وقت پر علاج ملے ، ہر شہری کو مناسب قیمت پر دوائیاں دستیاب ہوں اور ہر کالونی میں بنیادی صحت خدمات یقینی بنائی جائیں۔
وزیراعلیٰ نے کہا کہ سابقہ حکومتوں کے پیش کردہ محلہ کلینک ماڈل میں نہ ڈاکٹر ملتے تھے ، نہ دوائیاں، اور نہ ہی مناسب اسٹاف۔ انہوں نے کہا کہ اس کے برخلاف آروگیہ مندر حقیقی پرائمری ہیلتھ سینٹر ہیں، جہاں پٹی باندھنے سے لے کر دوائیں، ٹیکہ کاری، خاندانی منصوبہ بندی اور دیگر ضروری خدمات باقاعدگی سے دستیاب ہوتی ہیں۔ انہوں نے بتایا کہ دہلی میں اب تک تقریباً 250 آیوشمان آروگیہ مندر قائم کیے جا چکے ہیں۔ حکومت کا مقصد دہلی میں 1000 سے زیادہ ایسے مراکز قائم کرنا ہے ۔ بڑے اسپتالوں پر بڑھتے بوجھ کو دیکھتے ہوئے کالونی سطح پر ایسی سہولیات نہایت ضروری ہیں۔ حکومت کا یہ بھی ہدف ہے کہ دارالحکومت کی ہر اسمبلی میں کم از کم 15 ایسے مراکز کھولے جائیں۔
انہوں نے کہا کہ آیوشمان یوجنا، جن اوشدھی کیندروں اور نئی صحت خدمات کے توسیع کے ذریعے دہلی کو نہ صرف ملک بلکہ دنیا کے لیے بھی ایک ابھرتے ہوئے میڈیکل ہب کے طور پر ترقی دینے کی کوشش کی جا رہی ہے ۔ انہوں نے بتایا کہ پچھلے 8-10 مہینوں میں حکومت مسلسل 24×7 کی بنیاد پر کام کر رہی ہے تاکہ ہر شہری کو بروقت ضروری صحت خدمات مل سکیں۔
وزیراعلیٰ نے عوام سے اپیل کی کہ وہ علاقے کی مجموعی ترقی میں تعاون کریں، تاکہ دہلی کے لیے وزیراعظم کے وژن کو زمین پر اتارا جا سکے اور دارالحکومت کو ایک مضبوط، صحت مند اور جدید شہر بنایا جا سکے ۔
