گاڑیوں کی خرید و فروخت پر کڑی نگرانی‘وادی بھر میں پولیس کی بڑی کارروائیاں

سرینگر/۱۴نومبر
وادیِ کشمیر میں گاڑیوں کے غلط استعمال اور ان کی خرید و فروخت میں بے ضابطگیوں کو روکنے کے لیے پولیس نے مختلف اضلاع میں بیک وقت وسیع مہم شروع کرتے ہوئے متعدد گاڑیوں کے شورومز، پرانے وہیکل ڈیلرشپس اور ریکارڈ رجسٹرز کی تفصیلی جانچ کی۔
یہ اقدامات سیکیورٹی کے جاری انتظامات کا حصہ ہیں تاکہ کسی بھی گاڑی کو غیر قانونی، سماج دشمن یا دہشت گردانہ سرگرمیوں میں استعمال ہونے سے روکا جا سکے ۔
گاندربل پولیس نے آج ضلع میں موجود تمام پرانے وہیکل سیل،پرچیز یونٹس کا معائنہ کیا۔ مختلف پولیس اسٹیشنوں کی خصوصی ٹیموں نے دستاویزات، ملکیت کے ریکارڈ، ٹرانزیکشن رجسٹرز اور گاڑیوں کی تصدیق کا جائزہ لیا۔
اس دوران مالکان اور عملے کو سختی سے ہدایت دی گئی کہ خرید و فروخت کا مکمل ریکارڈ، کسٹمر کی شناخت اور لین دین کی تمام تفصیلات باقاعدہ طور پر محفوظ رکھی جائیں۔
پولیس نے مشکوک یا غیر واضح لین دین سے متعلق فوری اطلاع دینے پر بھی زور دیا۔
اونتی پورہ پولیس نے ضلع میں گاڑیوں کے معاملے میں مبینہ مشکوک عناصر کی نشاندہی کے بعد ضلع گیر انکوائری شروع کی۔ ایس ڈی پی اوز اور ایس ایچ اوز نے اپنی حدود میں موجود تمام کار ڈیلرز کا ریکارڈ چیک کیا، خاص طور پر ایسے معاملات کا جائزہ لیا گیا جہاں ایک ہی شخص نے متعدد گاڑیاں خریدی ہوں۔
ڈیلرز کو خریدار و فروخت کنندہ کے آدھار، فون نمبر اور مکمل تفصیلات درج کرنے کی سخت ہدایات دی گئیں۔ ایس ایس پی اونتی پورہ نے کہا کہ ایسے اقدامات اس بات کو یقینی بنانے کے لیے ضروری ہیں کہ گاڑیوں کا غلط استعمال نہ ہو۔
پولیس نے جنوبی کشمیر کے ضلع شوپیاں میں گاڑیوں اور مختلف کار ڈیلروں کے پاس موجود ریکارڈز کی جانچ شروع کی ہے ۔
پولیس کا کہنا ہے کہ اس اقدام کا مقصد گاڑیوں کی خرید و فروخت کو میں شفافیت کو یقینی بنایا اور گاڑیوں کے ممکنہ غلط استعمال کی روک تھام کو یقینی بنانا ہے ۔انہوں نے کہا کہ اس مہم کے دوران پولیس ٹیموں نے شورومز میں موجود گاڑیوں کی فزیکل جانچ کی اور فروخت، خریداری اور ملکیت کی منتقلی سے متعلق دستاویزات کا جائزہ لیا۔
ان کا کہنا ہے کہ خاص توجہ لین دین کے ریکارڈ کی درستگی کی جانچ، ملکیت کی بروقت منتقلی اور کسی بھی ایسی بے ضابطگی کی نشاندہی پر دی گئی جو غیر قانونی استعمال کا باعث بن سکتی ہو۔
ایک پولیس ترجمان نے بتایا کہ کار ڈیلروں کو ہدایت دی گئی کہ وہ گاڑیوں کی تمام لین دین کا مکمل ، درست اور تازہ ریکارڈ رکھیں اور قانونی تقاضوں کی سختی سے پابندی کریں۔
ترجمان نے کہا کہ پولیس ٹیموں نے ڈیلروں کو ریکارڈ منظم رکھنے کی اہمیت سے بھی آگاہ کیا جو ضلع میں مجمموعی سیکورٹی نظام کو مضبوط بنانے میں معاون ہے ۔
ان کا کہنا ہے کہ گاڑیوں کی فزیکل جانچ اور ریکارڈ کی جانچ آئندہ دنوں میں بھی جاری رہے گی جو نگرانی میں اضافہ، قوانین پر عمل در آمد اور عوامی تحفظ کو یقینی بنانے کی مسلسل کوششوں کا حصہ ہے ۔
پولیس نے ڈیلرز کو بروقت ملکیت منتقلی، درست ریکارڈ رکھنے اور کسی بھی بے ضابطگی کی صورت میں فوری اطلاع دینے کی ہدایت کی۔ایجنسیز