ماں سیتا کے آشیرواد سے ہی بہار ایک ترقی یافتہ ریاست بنے گا: مودی

سیتامڑھی، 8 نومبر (یو این آئی) وزیر اعظم نریندر مودی نے ہفتہ کے روز سیتامڑھی کی سرزمین سے خطاب کرتے ہوئے کہا کہ ماں سیتا کے آشیرواد سے ہی رام مندر کی تعمیر کا فیصلہ رام للا کے حق میں آیا تھا اور انہی کی کرپا سے بہار ایک ترقی یافتہ ریاست بنے گا۔
وزیر اعظم نے ایک عوامی جلسے سے خطاب کرتے ہوئے کہا کہ یہ میرے لیے خوش قسمتی کی بات ہے کہ میں ماں سیتا کی جنم بھومی پر آیا ہوں۔ انہوں نے کہا کہ پچھلی بار 8 نومبر 2019 کو انہیں سیتا ماتا کی دھرتی پر آنے کا موقع ملا تھا اور اگلے ہی دن صبح پنجاب میں کرتارپور صاحب کوریڈور کے افتتاح کے لیے جانا تھا۔ اسی دن سپریم کورٹ میں ایودھیا مقدمے پر فیصلہ بھی آنا تھا۔
انہوں نے کہا کہ اُس وقت ان کا دل پرارتھنا کر رہا تھا کہ سیتا میا کے آشیرواد سے فیصلہ رام للا کے حق میں آئے تو کتنا اچھا ہوگا۔ انہوں نے کہا کہ ان کی پرارتھنا قبول ہوئی، سیتا میا کا آشیرواد ملا اور فیصلہ رام للا کے حق میں آیا۔ آج وہ ایک بار پھر سیتا ماتا کی دھرتی پر آکر ان کا آشیرواد لے رہے ہیں اور اُن لمحات کو یاد کر رہے ہیں۔
مسٹر مودی نے کہا کہ ماں سیتا کے آشیرواد سے ہی بہار ترقی یافتہ ریاست بنے گا۔ انہوں نے کہا کہ اس بار کا بہار اسمبلی الیکشن وکست بہار کی تعمیر کے لیے ہے ، اور یہی انتخاب طے کرے گا کہ آنے والے برسوں میں بہار کے بچوں کا مستقبل کیسا ہوگا۔
انہوں نے راشٹریہ جنتا دل (آر جے ڈی) کو ہدف تنقید بناتے ہوئے کہا کہ آر جے ڈی والے بہار کے بچوں کے لیے جو کرنا چاہتے ہیں، وہ ان کی انتخابی تشہیر میں بج رہے گانے سنیں گے تو آپ کو محسوس ہوگا کہ ان کا پیغام کیا ہے ۔ انہوں نے کہا کہ معصوم بچوں سے گانے گوا کر یہ کہا جا رہا ہے کہ انہیں ‘رنگدار’ بننا ہے ، اور اب بہار کے عوام کو طے کرنا ہے کہ وہ اپنے بچوں کو رنگدار یا ڈاکٹر بنانا چاہتے ہیں۔
وزیر اعظم نریندر مودی نے کہا کہ بہار کے لوگوں نے کمال کر دیا ہے اور پہلے مرحلے کی ووٹنگ کے بعد جنگل راج والوں کو بجلی کا جھٹکا لگا ہے ۔ انہوں نے کہا کہ ہر طرف اس بات کا چرچہ ہے کہ بہار کی خواتین اور نوجوانوں نے ترقی کو چُنا ہے ۔ مودی نے کہا کہ دنیا کی سب سے بڑی طاقت عوام کی طاقت ہے اور سیتامڑھی کی یہ ریلی دیکھ کر اس طاقت کا احساس ہو رہا ہے ۔
مسٹر مودی نے کہا کہ بہار کی این ڈی اے حکومت میں کَٹّہ والوں کے لیے کوئی جگہ نہیں ہے ۔ انہوں نے کہا کہ این ڈی اے کی حکومت بچوں کے ہاتھوں میں لیپ ٹاپ، کمپیوٹر، کتابیں اور کھیل کود کا سامان دے رہی ہے ، لیکن دوسری طرف مہاگٹھ بندھن کے لوگ انہیں کٹّہ تھمانے کی فکر میں ہیں۔
وزیر اعظم نے کہا کہ مہاگٹھ بندھن کے لیڈر صرف اپنے بچوں کے خواب دیکھتے ہیں، انہیں وزیر بنانا چاہتے ہیں، لیڈر بنانا چاہتے ہیں، مگر عوام کے ووٹ سے منتخب ہونے کے بعد یہ عام لوگوں کے بچوں کو رنگدار بنانے کی کوشش کر رہے ہیں۔ انہوں نے کہا کہ اب عوام سب سمجھ چکے ہیں اور اس کا اثر پہلے مرحلے کے الیکشن میں صاف نظر آیا ہے ۔
مسٹر مودی نے کہا کہ یہ وہی صوبہ ہے جہاں کرپوری ٹھاکر اور بھولا پاسوان شاستری جیسے رہنماؤں نے عوام کو سماجی انصاف دلانے کی کوشش کی تھی، مگر جیسے ہی آر جے ڈی (راشٹریہ جنتا دل) کی حکومت آئی، پورا ماحول بدل گیا اور سماجی انصاف کی سوچ آہستہ آہستہ جنگل راج میں بدل گئی۔