ڈی جی پی نلن پربھات کا وادی کی سکیورٹی کا جائزہ

سرینگر/۶ نومبر
جموں کشمیر کے ڈائریکٹر جنرل پولیس نلن پربھات (آئی پی ایس) نے آج پولیس کنٹرول روم (پی سی آر) کشمیر میں ایک اعلیٰ سطحی سکیورٹی جائزہ اجلاس کی صدارت کی، جس میں وادی کی موجودہ سکیورٹی صورتحال کا تفصیلی جائزہ لیا گیا اور حفاظتی و انٹیلی جنس نظام کو مزید مضبوط بنانے کے لیے حکمتِ عملی تیار کی گئی۔
اجلاس کے آغاز میں متعلقہ افسران نے اپنے اپنے اضلاع میں سیکیورٹی کی صورتحال اور آپریشنل تیاریوں سے ڈی جی پی کو آگاہ کیا۔
ڈی جی پی نلن پربھات نے موجودہ انتظامات کا جائزہ لیتے ہوئے مجموعی ہم آہنگی، کارکردگی اور میدانی تیاری کو مزید بہتر بنانے کے لیے متعدد ہدایات جاری کیں۔
پولیس سربراہ نے شہر کے سکیورٹی گرڈ کو جدید نگرانی، مؤثر بین الاہنگی اور فعال فیلڈ انگیجمنٹ کے ذریعے مضبوط کرنے پر زور دیا۔ ساتھ ہی انہوں نے ہدایت دی کہ اہم اور حساس مقامات پر اچانک اور متحرک ناکے قائم کیے جائیں تاکہ علاقے پر مکمل گرفت اور کسی بھی تخریبی سرگرمی کو روکا جا سکے۔
ڈی جی پی نے اضلاع کے درمیان بلاتعطل رابطے اور بروقت معلومات کے تبادلے پر بھی زور دیا تاکہ سیکیورٹی اقدامات میں ہم آہنگی برقرار رہے۔
پربھات نے کہا کہ تمام اضلاع اپنے’کویِک ری ایکشن ٹیموں‘ (کیو آر ٹیز) کو بہتر نقل و حرکت، تربیت اور آلات سے مزید مضبوط بنائیں۔ اس کے ساتھ ہی مواصلاتی نظام کی جدید کاری اور اپ گریڈیشن کی بھی ہدایت دی تاکہ تمام سطحوں پر محفوظ اور بلاتعطل رابطہ برقرار رکھا جا سکے۔
ڈی جی پی نے اجلاس کے اختتام پر کہا کہ پیشہ ورانہ طرزِ عمل، چوکسی اور عوام دوست پولیسنگ کو برقرار رکھتے ہوئے آپریشنل تیاری کی اعلیٰ سطح کو یقینی بنایا جائے۔
اس اجلاس میں اسپیشل ڈی جی کوآرڈی نیشن ایس جے ایم گلانی، آئی جی پی کشمیر زون، آئی جی سی آر پی ایف (کے او ایس)، آئی جی سی آر پی ایف (سری نگر سیکٹر)، رینج ڈ آئی جیز، ڈی آئی جی ایس ایس بی سری نگر، ڈی آئی جیز سی آر پی ایف (جنوبی و شمالی سری نگر)، تمام اضلاع کے ایس ایس پیز، ایس ایس پی پی سی آر کشمیر، ایس پی پی سی سری نگر اور دیگر اعلیٰ افسران نے شرکت کی۔
’ندائے مشرق خبر)
۔۔۔۔۔۔۔۔۔۔۔