اودھم پور میں منشیات فروش کی ۵۰لاکھ روپیوں کی جائیداد ضبط:پولیس

جموں/۵نومبر
منشیات فروشوں کے خلاف سخت کارروائیوں کو جاری رکھتے ہوئے جموں و کشمیر پولیس نے ضلع اودھم پور میں ایک منشیات فروش کی۵۰لاکھ روپیے مالیت کی منقولہ و غیر منقولہ جائیداد کو این ڈی پی ایس ایکٹ کے تحت ضبط کر دیا۔
ایک پولیس ترجمان نے بتایا کہ اودھم پور پولیس نے ایک اور منشیات فروش کی۵۰لاکھ روپیے مالیت کی جائیداد کو این ڈی پی ایس ایکٹ کے تحت ضبط کر دیا۔
انہوں نے بتایا کہ پولیس اسٹیشن اودھم پور میں این ڈی پی ایس ایکٹ کے متعلقہ دفعات کے تحت ایف آئی آر نمبر۲۰۲۵/۲۵۸کی تحقیقات کے دوران یہ بات سامنے آگئی کہ ملزم امیت سنگھ ولد کلدیپ سنگھ ساکن سونتھن اودھم پور نے منشیات کے غیر قانونی کارو بار سے حاصل شدہ رقم سے پریان سونتھن گائوں میں ایک رہائشی مکان بمع زمین زیر خسرہ نمبر۷؍اور ایک ڈیوک کے ایم ٹی موٹر سائیکل خریدی تھی۔
ان کا کہنا ہے کہ تحقیقات کے دوران شواہد اور مواد کی بنیاد پر تفتیشی افسر کو یقین ہوا کہ مذکورہ جائیدادیں غیر قانونی کارو بار سے حاصل کی گئی ہیں جس کے بعد ان منقولہ و غیر منقولہ جائیدادوں کو این ڈی پی ایس ایکٹ کے دفعہ۶۸ (ایف) کے تحت ضبط کر لیا گیا تاکہ مزید قانونی کارروائی عمل میں لائی جا سکے ۔
پولیس ترجمان نے بتایا کہ ضبط شدہ مکان، زمین اور موٹر سائیکل کی کل مالیت۵۰لاکھ روپیے بتائی جارہی ہے ۔
ترجمان نے کہا کہ اودھم پور پولیس نے سال رواں کے دوران اب تک ضلع میں منشیات سے متعلق مقدمات میں۵۰ء۱۰کروڑ روپے مالیت کی جائیداد ضبط کی ہے جو اس بات کی عکاس ہے کہ پولیس ضلع کو منشیات سے پاک بنانے کیلئے پر عزم ہے ۔