سرینگر/۵نومبر
بارڈر سیکیورٹی فورس (بی ایس ایف) کے اہلکاروں نے رازدان پاس پر پھنسے سات شہریوں کو بحفاظت بچالیا۔
اطلاعات کے مطابق جب بی ایس ایف پوسٹ رازدان کے اہلکاروں کو اطلاع ملی کہ شدید برف باری کے سبب کچھ لوگ اس علاقے میں پھنس گئے ہیں، تو کمپنی کمانڈر نے فوراً ایک ریسکیو پارٹی روانہ کی۔ اہلکاروں نے منفی درجہ حرارت اور تیز ہواؤں کے باوجود اپنی جانوں کو خطرے میں ڈال کر امدادی کارروائی انجام دی۔
بی ایس ایف کے جوانوں نے برف سے ڈھکی سڑکوں پر کئی گھنٹوں کی جدوجہد کے بعد تمام سات شہریوں کو محفوظ مقام تک پہنچایا۔ بعد ازاں ان افراد کو بی ایس ایف کیمپ میں پناہ دی گئی، جہاں انہیں گرم کھانا اور ضروری طبی امداد فراہم کی گئی۔
بی ایس ایف حکام نے بتایا کہ رازدان پاس پر برف باری کے سبب درجہ حرارت نقطہ انجماد سے کئی درجے نیچے گر گیا تھا، جس کی وجہ سے عام شہریوں کے لیے وہاں رکنا نہایت خطرناک ثابت ہوسکتا تھا۔
قابل ذکر ہے کہ رازدان پاس وادی کشمیر کو بانڈی پورہ اور گریز کے درمیان جوڑنے والا ایک اہم پہاڑی راستہ ہے جو اکثر موسمِ سرما میں بھاری برف باری کے سبب بند ہوجاتا ہے ۔ بی ایس ایف کے اس بروقت اقدام کو مقامی لوگوں اور حکام نے انسانی ہمدردی کی ایک مثال قرار دیا ہے ۔
