سرینگر/۴نومبر
وادی کشمیر کے بالائی علاقوں میں برفباری کا سلسلہ منگل کی شام بھی جاری رہا، جبکہ محکمہ موسمیات نے پیش گوئی کی ہے کہ ہلکی سے درمیانی درجے کی بارش اور برفباری آئندہ۱۲ گھنٹوں تک جاری رہ سکتی ہے۔
میدانی علاقوں ‘بشمول سرینگر میںمنگل کی سہ پہر کو پہلے تیز ہوائیں چلیں پھر بارشوں کا سلسلہ بھی شروع ہو گیا ۔
آزاد موسمی ماہر فیضان عارف کے مطابق شام ۶بجے تک رازدان ٹاپ پر دو انچ برف ریکارڈ کی گئی، جبکہ سونمرگ، بالتل اور زوجیلا درہ میں ہلکی برفباری ہوئی جس کی موٹائی ایک سے دو سینٹی میٹر تک تھی۔
عارف نے مزید بتایا کہ گریز وادی کے علاقے تلیل میں بھی ایک سے دو سینٹی میٹر برفباری ریکارڈ کی گئی، جب کہ سنتھن ٹاپ، پیر کی گلی اور گلمرگ میں بھی ہلکی برفباری دیکھی گئی۔
مختصر المدتی پیش گوئی کے حوالے سے فیضان نے کہا کہ آئندہ ۸ سے ۱۰ گھنٹوں کے دوران بارش اور برفباری کا سلسلہ جاری رہنے کا امکان ہے، جس کے بعد موسم بتدریج صاف ہونا شروع ہوگا۔
انہوں نے مزید کہا کہ کل سے موسم زیادہ تر خشک رہنے کی توقع ہے اور آئندہ۱۰ سے ۱۵ دن تک جموں و کشمیر میں یہی صورتحال برقرار رہے گی۔
یہ موسمی پیٹرن جہاں میدانی علاقوں میں راحت کا باعث بن رہا ہے، وہیں بالائی علاقوں میں برف کی موجودگی سیاحت اور وادی کے آبی ذخائر کے لیے نہایت اہم ہے۔
اس دوران محکمے موسمیات کے ایک ترجمان کے مطابق وادی میں۵نومبر سے درجہ حرارت میں گراوٹ درج ہوسکتی ہے ۔ انہوں نے کہا کہ پہاڑی علاقوں میں شبانہ برف باری سے سڑکوں پر پھسلن ہوسکتی ہے جس کے نتیجے میں ٹریفک کی نقل و حمل مختصر وقفے کے لئے متاثر رہنے کا بھی امکان ہے ۔
محکمے کے مطابق شمالی کشمیر کے میدانی علاقوں میں ہلکی بارش کا سلسلہ سہ پہر تین بجے سے پانچ بجے تک جاری رہ سکتا ہے جبکہ وسطی کشمیر کے میدانی علاقوں میں شام پانچ بجے سے رات۱۰بجے تک اور جنوبی کشمیر کے میدانی علاقوں میں شام پانچ بجے سے رات گیارہ بجے تک ہلکی بارش کا امکان ہے ۔
انہوں نے کہا کہ اس دوران کہیں ہلکی تو کہیں درمیانی درجے کی بارشوں کا امکان ہے تاہم میدانی علاقوں میں برف باری کا کوئی امکان نہیں ہے ۔
