سرینگر/۳نومبر
بارہمولہ ضلع انتظامیہ نے مقامی صحافیوں کی اسناد کی جانچ اور توثیق کے عمل کا آغاز کیا ہے تاکہ میڈیا شناخت کے ناجائز استعمال اور جعلی صحافت کے بڑھتے رجحان پر قابو پایا جا سکے ۔
اس سلسلے میں ضلع انفارمیشن آفیسر کے دفتر کی جانب سے ایک حکم نامہ جاری کیا گیا ہے جس میں ضلع میں کام کرنے والے تمام صحافیوں کو سات دن کے اندر اپنی تفصیلات اور اسناد جمع کرانے کی ہدایت دی گئی ہے ۔
یہ کارروائی جوائنٹ ڈائریکٹر انفارمیشن کشمیر کے احکامات کے تحت عمل میں لائی جا رہی ہے ۔ حکم نامے میں کہا گیا ہے کہ تمام میڈیا اہلکاروں کو اپنی تفصیلات دفتر انفارمیشن بارہمولہ میں جمع کرانی ہوں گی۔
سرکاری اعلامیے کے مطابق، اس اقدام کا مقصد’صحافت کے تقدس کا تحفظ‘کرنا اور جعلی صحافیوں کے بڑھتے ہوئے مسئلے پر روک لگانا ہے تاکہ ضلع میں صرف مستند اور مصدقہ میڈیا اہلکار ہی پیشہ ورانہ ذمہ داریاں انجام دے سکیں۔
حکم نامے میں واضح کیا گیا ہے کہ صرف وہی صحافی جو ضلع انفارمیشن آفس سے ’باضابطہ توثیق شدہ‘ہوں گے ، انہیں سرکاری تقریبات، پریس کانفرنسوں اور وی وی آئی پیز و وی آئی پیز کے دوروں کی میڈیا کوریج کی اجازت دی جائے گی۔ کسی بھی غیر مجاز یا غیر تصدیق شدہ شخص کو کسی بھی صورت میں داخل ہونے یا کوریج کی اجازت نہیں دی جائے گی۔
ضلعی انتظامیہ نے اس معاملے پر واضح کیا ہے کہ صحافت ایک ذمہ دارانہ پیشہ ہے اور اس کے وقار کو برقرار رکھنے کے لیے شفاف نظام ناگزیر ہے ۔ایجنسیز
