اگلے دو دنوں کے دوران برفباری و بارشوں کا امکان

سرینگر/۳نومبر
خشک موسم کے بیچ محکمہ موسمیات نے وادی کشمیر میں اگلے دو دنوں کے دوران برف وباراں کی پیش گوئی کی ہے ۔
محکمے نے اپنی ایڈوائزری میں کسانوں سے کہا ہے کہ وہ ۴نومبر کو اپنے کھیت کھلیانوں میں زراعت سے متعلق کام معطل رکھیں۔
موسمیات محکمے کے ایک ترجمان نے بتایا کہ جموںکشمیر میں۳نومبر کو موسم مجموعی طور پر خشک رہنے کا امکان ہے ۔
ترجمان نے کہا کہ ۴؍اور۵نومبر کو وادی کے میدانی علاقوں میں درمیانی درجے کی بارشیںاور پہاڑی علاقوں میں کہیں کہیں ہلکی برف باری متوقع ہے جبکہ جموں صوبے میں۴نومبر کی شام سے۵نومبر کی صبح سے کہیں کہیں بارشوں کا امکان ہے ۔
ان کا کہنا ہے کہ بعد میں۶سے۱۵نومبر تک موسم ایک بار پھر خشک رہ سکتا ہے ۔
محکمے نے بتایا کہ وادی کے کچھ علاقوں میں۴نومبر کی شام کو گرج چمک کے ساتھ۳۰سے۴۰کلو میٹر فی گھنٹے کی رفتار سے تیز ہوائیں چل سکتی ہیں۔انہوں نے کہا کہ وادی میں۵نومبر سے درجہ حرارت میں نمایاں گراوٹ درج ہونے کا امکان ہے ۔
محکمے نے اپنی ایڈوائزری میں کسانوں سے کہا ہے کہ وہ۴نومبر کو اپنے کھیت کھلیانوں میں زراعت سے متعلق کام معطل رکھیں۔انہوں نے کہا کہ کشمیر کے بیشتر علاقوں میں شبانہ درجہ حرارت۰سے۳ڈگری سینٹی گریڈ معمول سے زیادہ ریکارڈ ہوا ہے ۔
وادی میں مشہور سیاحتی مقام پہلگام سرد ترین جگہ رہی ہے جہاں کم سے کم درجہ حرارت منفی۶ء۰ڈگری سینٹی گریڈ ریکارڈ ہوا ہے جبکہ صوبہ جموں میں بانہال سب سے سرد علاقہ رہا ہے جہاں شبانہ درجہ حرارت۵ء۵ڈگری سینٹی گریڈ ریکارڈ ہوا ہے ۔
ادھر وادی میں پیر کو صبح سے ہی مطلع صاف رہا اور نحیف سی دھوپ بھی چھائی رہی جس سے جہاں لوگوں کو لطف اندوز ہوتے ہوئے دیکھا گیا وہیں کسانوں کو بھی اپنے کھیت کھلیانوں میں مختلف کاموں کے ساتھ مصروف دیکھا گیا۔یو این آئی