اگلے چیف جسٹس کے لیے جسٹس سوریہ کانت کے نام کی سفارش

نئی دہلی، 27 اکتوبر (یو این آئی) سپریم کورٹ کے چیف جسٹس بی آر گوئی نے سینیٗرٹی کی طے شدہ روایت پر عمل کرتے ہوئے اگلے چیف جسٹس کے طور پر جسٹس سوریہ کانت کے نام کی باضابطہ طور پر سفارش کی ہے ۔
جسٹس گوئی نے اس ہفتے کے آغاز میں مرکزی وزارتِ قانون کو لکھے گئے ایک خط میں یہ سفارش کی۔ جسٹس سوریہ کانت اس وقت جسٹس گوئی کے بعد سپریم کورٹ کے سب سے سینئر جج ہیں۔ جسٹس سوریہ کانت نومبر 2025 میں جسٹس گوئی کی سبکدوشی کے بعدہندوستان کے 53ویں چیف جسٹس کے طور پر عہدہ سنبھالیں گے ۔
مرکزی حکومت نے حال ہی میں اگلے چیف جسٹس کی تقرری کے عمل کا آغاز کیا ہے ۔ اس روایت کے تحت موجودہ چیف جسٹس کے عہدہ چھوڑنے سے تقریباً ایک ماہ پہلے نئے چیف جسٹس کے نام کا اعلان کیا جاتا ہے ۔
قابلِ ذکر ہے کہ جسٹس گوئی 24 مئی 2019 کو سپریم کورٹ کے جج مقرر ہوئے تھے اور 14 مئی 2025 کو انہیں ہندوستان کے چیف جسٹس کے طور پر مقرر کیا گیا۔ وہ 23 نومبر 2025 کو ریٹائر ہوں گے ۔
جسٹس سوریہ کانت کی پیدائش ہریانہ کے حصار میں ہوئی۔ انہوں نے 1981 میں سرکاری پوسٹ گریجویٹ کالج، حصار سے گریجویشن کی ڈگری حاصل کی اور 1984 میں مہارشی دیانند یونیورسٹی، روہتک سے ایل ایل بی کیا۔ اسی سال انہوں نے حصار ڈسٹرکٹ کورٹ میں وکالت شروع کی، مگر اگلے ہی سال چنڈی گڑھ منتقل ہو گئے اور پنجاب و ہریانہ ہائی کورٹ میں پریکٹس شروع کی۔
جسٹس سوریہ کانت 7 جولائی 2000 کو ہریانہ کے ایڈوکیٹ جنرل مقرر ہوئے اور ریاست کے سب سے کم عمر ایڈوکیٹ جنرل بننے کا اعزاز حاصل کیا۔ 9 جنوری 2004 کو انہیں پنجاب و ہریانہ ہائی کورٹ کے مستقل جج کے طور پر مقرر کیا گیا۔ انہوں نے 2007 سے 2011 کے درمیان دو مسلسل مدتوں تک نیشنل لیگل سروسز اتھارٹی (این اے ایل ایس اے ) کی گورننگ باڈی کے رکن کے طور پر بھی خدمات انجام دیں۔ سپریم کورٹ کے جج بننے سے پہلے وہ ہماچل پردیش ہائی کورٹ کے چیف جسٹس کے عہدے پر فائز رہے ۔