راجیہ سبھا الیکن:’’عمر نے جموں بمقابلہ کشمیر کا بیانیہ بنایا‘

جموں/۲۵؍اکتوبر
جموں کشمیر بھارتیہ جنتا پارٹی (بی جے پی) کے صدر ست شرما نے کہا ہے کہ راجیہ سبھا انتخابات میں ان کی کامیابی اس بات کا ثبوت ہے کہ عوامی ضمیر نے خطے کی تفریق پر مبنی سیاست کو مسترد کر دیا۔ انہوں نے الزام لگایا کہ وزیر اعلیٰ عمر عبداللہ نے انتخاب کو ’’جموں بمقابلہ کشمیر‘‘ کے رنگ میں رنگنے کی کوشش کی، لیکن بی جے پی نے اس کے باوجود تاریخی جیت حاصل کی۔
کشمیر سے کامیابی کے بعد جموں واپسی پر پارٹی کارکنان نے ست شرما کا پْرتپاک استقبال کیا۔ وہ قافلے کی شکل میں ترکوٹا نگر واقع پارٹی ہیڈکوارٹر پہنچے، جہاں ’’بھارت ماتا کی جے‘‘ اور وزیر اعظم نریندر مودی کے حق میں نعرے گونجتے رہے۔
جموں و کشمیر میں بطور مرکزِ زیرِ انتظام علاقہ بننے کے بعد منعقد ہونے والے پہلے راجیہ سبھا انتخابات میں نیشنل کانفرنس (این سی) نے تین اور بی جے پی نے ایک نشست حاصل کی۔
تیسری نوٹیفکیشن کے تحت ست شرما نے این سی امیدوار عمران نبی ڈار کو۳۲ ووٹوں کے مقابلے میں ۲۲ ووٹ حاصل کرکے شکست دی، جبکہ این سی کے گروویندر سنگھ اوبرائے بھی ۳۱ ووٹ لے کر کامیاب ہوئے۔
شرما نے میڈیا سے گفتگو میں کہا’’یہ پارٹی کے لیے ایک تاریخی لمحہ ہے۔ میں نے کسی سے کوئی وعدہ یا لالچ نہیں دیا۔ میں نے صرف یہ کہا کہ اپنے ضمیر کی آواز سن کر ووٹ دیں۔ اس بار چار غیر بی جے پی اراکین نے ہمیں ووٹ دیا، اگلی بار ضمیر کی آواز سننے والے چالیس اور ہوں گے‘‘۔
بی جے پی لیڈر نے کہا کہ پارٹی کی یہ جیت وزیر اعظم نریندر مودی کی قیادت پر عوام کے اعتماد کا مظہر ہے۔ان کاکہناتھا’’میں یہ جیت وزیر اعظم، پارٹی کارکنان اور عوام کے نام کرتا ہوں۔ ہم سب کا ساتھ، سب کا وکاس، سب کا وشواس، سب کا پریاس’ کے جذبے کے ساتھ خدمت جاری رکھیں گے‘‘۔
پیپلز کانفرنس کے سربراہ سجاد غنی لون کے اْس الزام پر کہ این سی نے بی جے پی کو ’’تحفے‘‘ میں سات ووٹ دیے، ست شرما نے کہا’’اب جو وہ کہہ رہے ہیں، اس کی کوئی اہمیت نہیں۔ اگر وہ اتنے مخلص تھے تو ووٹ کیوں نہیں دیا؟ چاہے ’اے‘ کے لیے یا ’بی‘ کے لیے۔ ووٹنگ سے دور رہنا غیر جمہوری عمل ہے‘‘۔
شرما نے مزید کہا کہ بی جے پی نے کشمیر کی سرزمین سے یہ نشست جیتی ہے، جو پارٹی کے لیے ایک نئے سیاسی باب کی شروعات ہے۔انہوں نے کہا’’عمر عبداللہ نے اراکین اسمبلی سے کہا کہ بی جے پی کے خلاف متحد ہوجائیں۔ لیکن عوام نے فرقہ وارانہ سوچ کو مسترد کر دیا۔ آج کشمیر بدل چکا ہے، لوگ لال چوک میں آزادی سے گھوم سکتے ہیں اور تصاویر لے سکتے ہیں‘‘۔
بی جے پی لیڈر نے اعتماد ظاہر کیا کہ بی جے پی ۱۱ نومبر کو ہونے والے ناگرہ اور بڈگام ضمنی انتخابات میں بھی کامیابی حاصل کرے گی۔
جموں و کشمیر اسمبلی میں قائدِ حزبِ اختلاف سنیل شرما نے ان سات اراکین کا شکریہ ادا کیا جنہوں نے ’’این سی کو مسترد کرتے ہوئے بی جے پی کے امیدوار کی حمایت کی‘‘۔انہوں نے کہا’’ہم نہیں جانتے وہ کون ہیں، مگر اتنا ضرور واضح ہے کہ انہوں نے حکومت کو ایک وارننگ دی ہے۔ ممکن ہے ایسے کئی اور ارکان ہوں جو حکومت کی پالیسیوں سے ناخوش ہیں‘‘۔
ادھر بی جے پی کے ناراض رہنما جہانزیب سرورال نے راجیہ سبھا انتخابات میں ’’شرمناک ہارس ٹریڈنگ‘‘ پر سخت ردِ عمل ظاہر کیا۔انہوں نے کہا’’یہ افسوسناک ہے کہ ہارس ٹریڈنگ اور پارٹی وہپ کے خلاف ووٹ ڈالنے جیسے اقدامات کو سیاسی مہارت کے نام پر جواز دیا جا رہا ہے۔ یہ جمہوریت کے اصولوں کے لیے خطرناک رجحان ہے‘‘۔انہوں نے مزید کہا’’یہ منظر کہ لیڈر ایک دوسرے کے ووٹ لینے پر فخر کر رہے ہیں، موقع پرستی اور اخلاقی زوال کی کھلی مثال ہے۔
(ویب ڈیسک)‘‘