کوکر ناگ میں نقلی پولیس آفیسر گرفتار ایس ایس پی رینک کی وردی ضبط

سرینگر/۲۴؍اکتوبر
اننت ناگ پولیس نے ایک اہم کارروائی کے دوران ایک ایسے شخص کو گرفتار کیا ہے جو خود کو سینئر پولیس افسر ظاہر کر رہا تھا۔ پولیس نے مشتبہ شخص کے قبضے سے سینئر سپرنٹنڈنٹ آف پولیس (ایس ایس پی) رینک والی پولیس وردی بھی برآمد کی ہے ۔
پولیس ذرائع کے مطابق جمعہ کے روز تھانہ کوکرناگ کی ایک ناکہ پارٹی نے معمول کی چیکنگ کے دوران ایک مشتبہ شخص کو روکا جو ایک بیگ لیے ہوئے تھا۔ پولیس پارٹی کو دیکھتے ہی اُس شخص نے موقع سے فرار ہونے کی کوشش کی تاہم پولیس اہلکاروں نے پیشہ وارانہ صلاحیتوں کو بروئے کار لا کر مذکورہ شخص کو دھر دبوچا۔
گرفتار شدہ شخص کی شناخت محمد عمر موچی ولد محمد جمال موچی ساکن زلنگام کے طور پر ہوئی ہے ۔ تلاشی کے دوران اُس کے بیگ سے پولیس کی وردی برآمد ہوئی جس پر ایس ایس پی کے رینک کے نشانات لگے ہوئے تھے ۔
ابتدائی تفتیش میں انکشاف ہوا کہ ملزم مبینہ طور پر خود کو سینئر پولیس افسر ظاہر کرکے عوام کو دھوکہ دینے کی کوشش کر رہا تھا۔ پولیس کا کہنا ہے کہ اس کے قبضے سے ملنے والی وردی کے حوالے سے مزید تحقیقات جاری ہیں تاکہ اس بات کا پتہ لگایا جا سکے کہ وہ وردی کہاں سے حاصل کی گئی اور اس کا مقصد کیا تھا۔
اس سلسلے میں تھانہ کوکرناگ میں ایف آئی آر نمبر۲۰۲۵/۱۱۸متعلقہ دفعات کے تحت درج کی گئی اور مزید تفتیش جاری ہے ۔
ضلع پولیس اننت ناگ نے عوام کو یقین دلایا ہے کہ ایسے عناصر کے خلاف سخت کارروائی کی جائے گی جو پولیس یا سول افسران کا روپ دھار کر عوامی اعتماد کو نقصان پہنچانے کی کوشش کرتے ہیں۔
پولیس نے شہریوں سے اپیل کی ہے کہ وہ چوکس رہیں اور اگر کسی مشکوک سرگرمی یا شخص کے بارے میں اطلاع ہو تو فوری طور پر نزدیکی پولیس اسٹیشن کو مطلع کریں تاکہ ایسے واقعات کو بروقت روکا جا سکے ۔ایجنسیز