شوپیاں میں۲خواتین منشیات فروش گرفتار‘ ممنوعہ مواد بر آمد

سرینگر/۲۲؍اکتوبر
منشیات فروشوں کے خلاف کریک ڈاؤن کو وسیع پیمانے پر جاری رکھتے جموں و کشمیر پولیس نے جنوبی کشمیر کے ضلع شوپیاں میں دو خواتین منشیات فروشوں کو گرفتار کرکے ان کی تحویل سے بھاری مقدار میں ممنوعہ مواد بر آمد کیا ہے ۔
ایک پولیس ترجمان نے اپنے ایک بیان میں بتایا کہ پولیس پوسٹ وچھی کی ایک ٹیم نے ملہورہ زینہ پورہ علاقے میں معمول کی ناکہ چیکنگ کے دوران دو خواتین کو روکا گیا جنہوں نے دو بڑے بیگ اٹھا رکھے تھے اور مشکوک حالت میں گھوم رہی تھیں۔
ترجمان نے کہا کہ تلاشی کے دوران ان تھیلوں سے ۱۵کلو پیسا ہوا بھنگ اور ایک کلو چرس جیسا مواد بر آمد کیا گیا ہے ۔
گرفتار شدہ خواتین کی شناخت روبینہ اختر ساکن رکھی لتر پلوامہ اور نرگس جان ساکن کوانی ڈاگری پورہ پلوامہ کے طور پر کی گئی۔
پولیس ترجمان نے بتایا کہ اس ضمن میں پولیس اسٹیشن زینہ پورہ میں این ڈی پی ایس ایکٹ کے متعلقہ دفعات کے تحت زیر ایف آئی آر نمبر۲۰۲۵/۹۲؍ایک مقدمہ درج کیا گیا اور مزید تحقیقات شروع کی گئی۔ انہوں نے کہا کہ پولیس منشیات سے پاک معاشرے کے قیام کے لئے پر عزم ہے ۔
اس دوران جموں وکشمیر پولیس نے جنوبی کشمیر کے اونتی پورہ میں دو منشیات فروشوں کو گرفتار کرکے ان کی تحویل سے چرس جیسا ممنوعہ مواد بر آمد کیا ہے ۔
ایک پولیس ترجمان نے اپنے ایک بیان میں کہا کہ پولیس اسٹیشن پامپور کی ایک ٹیم نے تولہ باغ علاقے میں ایک گاڑی جس میں دو افراد سوار تھے ، کو روکا۔
ترجمان نے کہا کہ تلاشی کے دوران گاڑی میں سوار دو افراد کی تحویل سے۳۰۰؍گرام چرس پائوڈر جیسا ممنوعہ مواد بر آمد کیا گیا جس کے بعد دونوں کو برسر موقع ہی گرفتار کیا گیا۔
گرفتار شدگان کی شناخت یونس نثار ولد نثار احمد ساکن ووین اور سید ماجد الطاف ولد محمد الطاف ساکن لیتہ پورہ کے طور پر کی گئی ہے ۔ان کا کہنا ہے کہ اس جرم کے لئے استعمال کی جانے والی گاڑی کو بھی ضبط کیا گیا۔
پولیس ترجمان نے بتایا کہ اس ضمن میں پولیس اسٹیشن پامپور میں این ڈی پی ایس ایکٹ کے متعلقہ دفعات کے تحت زیر ایف آئی آر نمبر۲۰۲۵/۱۱۱ایک مقدمہ درج کیا گیا اور مزید تحقیقات شرورع کی گئی۔
ترجمان نے کہا کہ پولیس معاشرے سے منشیات کے ناسور کے خاتمے کو یقینی بنانے کیلئے پر عزم ہے ۔ایجنسیز