آپریشن سندور کے ذریعے نیکی کو قائم رکھا، ظلم کا بدلہ لیا:مودی

نئی دہلی/۲۱؍ اکتوبر
وزیر اعظم نریندر مودی نے منگل کو دیوالی کے موقع پر ملک کے شہریوں کو خط لکھا، جس میں آپریشن سندور کی کامیابیوں اور نکسلی ازم کے خلاف جدوجہد کو اجاگر کیا اور کہا کہ ایسے وقت میں جب دنیا مختلف بحرانوں کا شکار ہے، بھارت استحکام کی علامت کے طور پر ابھرا ہے۔
مودی نے اپنی حکومت کی تاریخی کامیابیوں میں جی ایس ٹی کی شرح میں کمی کو شامل کیا اور کہا کہ ’جی ایس ٹی بچت اْتسَو‘ کے دوران شہریوں نے ہزاروں کروڑ روپے بچائے ہیں۔
وزیر اعظم نے شہریوں سے اپیل کی کہ وہ سوادیشی کو اپنائیں تاکہ ’ایک بھارت، شریشٹھ بھارت‘ کے جذبے کو فروغ دیا جا سکے، تمام زبانوں کا احترام کیا جائے، صحت کو ترجیح دی جائے اور یوگا کو اپنایا جائے۔
اپنے خط میں وزیر اعظم نے کہا’’یہ تمام اقدامات ہمیں جلد ہی ایک وِکشِت بھارت کی جانب لے جائیں گے۔‘‘ یہ خط انہوں نے ایک دن بعد لکھا جب انہوں نے دیوالی کی خوشیاں ملکی ساختہ ائیرکرافٹ کیریئر آئی این ایس وکرت پر نیوی اہلکاروں کے ساتھ منائیں۔
وزیر اعظم نے کہا’’میں آپ سب کو دیوالی کے اس پرمسرت موقع پر دل کی گہرائیوں سے مبارکباد پیش کرتا ہوں۔ یہ رام مندر کی عظیم تعمیر کے بعد دوسری دیوالی ہے‘‘۔انہوں نے مزید کہا’’بھگوان شری رام ہمیں نیکی کو قائم رکھنے کی تعلیم دیتے ہیں اور ناانصافی کے خلاف لڑنے کا حوصلہ بھی دیتے ہیں۔ ہم نے اس کا زندہ مظاہرہ کچھ ماہ قبل آپریشن سندور کے دوران دیکھا۔ اس آپریشن میں بھارت نے نہ صرف نیکی کو قائم رکھا بلکہ ناانصافی کا بدلہ بھی لیا۔‘‘
مودی نے کہا کہ اس دیوالی کی اہمیت اس لیے بھی بڑھ جاتی ہے کہ پہلی بار کئی اضلاع بشمول دور دراز علاقوں میں بھی دیے جلائے جائیں گے۔ان کاکہنا تھا’’یہ وہ اضلاع ہیں جہاں نکسلی اور ماؤسٹ دہشت گردی کو جڑ سے ختم کیا گیا۔ حالیہ دنوں میں بہت سے افراد نے تشدد کا راستہ چھوڑ کر ترقی کی مرکزی دھارے میں شمولیت اختیار کی اور ہمارے ملک کے آئین پر اعتماد کا اظہار کیا۔ یہ قوم کے لیے ایک بڑی کامیابی ہے۔‘‘
وزیر اعظم نے کہا کہ ان تاریخی کامیابیوں کے درمیان ملک نے حال ہی میں اگلی نسل کے اصلاحات کی جانب بھی قدم بڑھایا ہے۔
’’نوراتری کے پہلے دن ہی کم جی ایس ٹی کی شرح نافذ کی گئی۔ اس ‘جی ایس ٹی بچت اْتسَو’ کے دوران شہریوں نے ہزاروں کروڑ روپے بچائے ہیں۔‘‘انہوں نے کہا کہ ایسے وقت میں جب دنیا کئی بحرانوں سے دوچار ہے، بھارت استحکام اور حساسیت کی علامت کے طور پر ابھرا ہے۔
’’ہم قریبی مستقبل میں دنیا کی تیسری بڑی معیشت بننے کی راہ پر بھی گامزن ہیں۔‘‘
وزیر اعظم نے شہریوں کی بنیادی ذمہ داری پر زور دیا کہ وہ ملک کے لیے اپنے فرائض انجام دیں۔انہوں نے کہا’’آئیں ہم سوادیشی اپنائیں اور فخر سے کہیں، ‘یہ ہے سوادیشی‘‘۔
مودی نے کہا’’آئیں ہم ‘ایک بھارت، شریشٹھ بھارت’ کے جذبے کو فروغ دیں، تمام زبانوں کا احترام کریں، صفائی برقرار رکھیں، اپنی صحت کو ترجیح دیں، کھانے میں تیل کا استعمال۱۰ فیصد کم کریں اور یوگا اپنائیں۔ یہ تمام اقدامات ہمیں جلدی وِکشِت بھارت کی جانب لے جائیں گے’’۔
وزیر اعظم نے مزید کہا’’دیوالی ہمیں یہ بھی سکھاتی ہے کہ جب ایک دیا دوسرے کو روشن کرتا ہے تو روشنی کم نہیں ہوتی بلکہ بڑھ جاتی ہے۔ اسی جذبے کے ساتھ، آئیں اس دیوالی میں ہم اپنے معاشرے اور ماحول میں ہم آہنگی، تعاون اور مثبتیت کے دیے روشن کریں۔
(ویب ڈیسک)‘‘