بالود ضلع میں ماں بیٹی کی لاش مشتبہ حالت میں برآمد

بالود، 18 اکتوبر (یو این آئی) چھتیس گڑھ کے بالود ضلع میں ماں اور بیٹی کی لاش مشتبہ حالت میں برآمد ہوئی ہے ۔ اطلاع ملتے ہی موقع پر پہنچی پولیس نے ماں اور بیٹی کی لاشوں کو قبضے میں لے کر پوسٹ مارٹم کے لیے بھیج دیا ہے ۔ اطلاع کے مطابق یہ پورا معاملہ بالود ضلع کے کوتوالی تھانہ علاقے کے شکاری پارا کا ہے ۔ یہاں ایک گھر کے کمرے میں ماں اور بیٹی کی لاشیں مشتبہ حالت میں ہفتہ کے روز ملی،موقع پر پہنچی پولیس نے دیکھا کہ عورت کی لاش پھانسی کے پھندے پر لٹکی ہوئی ہے اور بچی کی لاش مشتبہ حالت میں ہے ۔پولیس کے ساتھ موقع پر پہنچی فارنسک ٹیم نے تفتیش شروع کر دی ہے ، پولیس نے ماں اور بیٹی کی لاشوں کو قبضے میں لے کر پوسٹ مارٹم کے لیے بھیج دیا ہے ۔
ذرائع کے مطابق جمعہ کی رات عورت کا 13 سالہ بیٹا گھر کے دوسرے کمرے میں سونے چلا گیا تھا، ہفتہ کی صبح جب وہ بیدار ہوا تو اس نے دیکھا کہ اس کی ماں پھانسی کے پھندے پر لٹکی ہوئی ہے اور اس کے پاس اس کی چھوٹی بہن مردہ حالت میں پڑی ہے ۔ یہ منظر دیکھ کر بچے نے شور مچایا، جس کے بعد آس پاس کے لوگ موقع پر پہنچے اور پولیس کو اطلاع دی گئی۔
پولیس سپرنٹنڈنٹ اور اعلیٰ افسران بھی موقع پر پہنچ کر واقعے کی تفصیلی تحقیقات میں مصروف ہیں، پولیس نے بتایا کہ فی الحال یہ واضح نہیں ہے کہ یہ معاملہ خودکشی کا ہے یا کچھ اور، ہر ممکن زاویے سے تفتیش کی جا رہی ہے ۔ پولیس کا کہنا ہے کہ پوسٹ مارٹم رپورٹ اور فارنسک تحقیقات کے بعد ہی موت کی وجوہات کا پتہ چل سکے گا۔