کولگام میں این ڈی پی ایکٹ کے تحت طویل عرصے سے مفرور دو افراد گرفتار: پولیس

سرینگر /۱۷؍ اکتوبر
فراری ملزمان کو انصاف کے کٹہرے میں لانے کی کوششوں کو جاری رکھتے ہوئے کولگام پولیس نے این ڈی پی ایس ایکٹ کے تحت مقدمات میں ملوث دو افراد کو گرفتار کیا ہے جو کئی برسوں سے گرفتاری سے بچ رہے تھے۔
ایک پولیس ترجمان نے اپنے ایک بیان میں بتایا کہ کولگام پولیس نے این ڈی پی ایس ایکٹ کے تحت دو ایسے افراد کو گرفتار کیا ہے جو کئی برسوں سے مفرور تھے۔
ترجمان نے کہا کہ اعجاز احمد شیخ ولد غلام قادر شیخ ساکن نسو بدر گنڈ جو پولیس اسٹیشن قاضی گنڈ میں این ڈی پی ایس ایکٹ کے متعلقہ دفعات کے تحت درج ایف آئی آر زیر نمبر۱۰۷/۲۰۰۵ میں مطلوب تھا، کو جے کے بینک قاضی گنڈ کے قریب گرفتار کیا گیا۔ان کا کہنا ہے کہ ملزم تقریباً ۲۰ برسوں سے گرفتاری سے بچ رہا تھا۔
پولیس ترجمان نے بتایا کہ ایک اور ملزم بلال احمد گنائی ولد غلام نبی گنائی ساکن لالن گنور کولگام حال لیوڈورہ نزدیک ریلوے برج قاضی گنڈجو پولیس اسٹیشن قاضی گنڈ میں این ڈی پی ایس ایکٹ کے تحت درج زیر ایف آئی آر نمبر۲۲۳/۲۰۰۶ میں مطلوب تھا، کو گرفتار کیا گیا۔
انہوں نے کہا کہ یہ ملزم گذشتہ ۱۹ برسوں سے مفرور تھا۔ان کا کہنا ہے کہ دونوں ملزمان طویل عرصے سے گرفتاری سے بچ رہے تھے تاہم اب انہیں پولیس نے گرفتار کیا ہے۔
ترجمان نے مزید کہا کہ ان کی گرفتاری کولگام پولیس کی ان مسلسل کوششوں کا نتیجہ ہے جو طویل عرصے سے فرار مجرموں خصوصاً منشیات کے مقدمات میں ملوث افراد کو گرفتار کرنے کے لئے جاری ہیں۔