سری لنکا کی وزیر اعظم آج تین روزہ دورے پر ہندوستان پہنچیں گی

نئی دہلی، 15 اکتوبر (یو این آئی) سری لنکا کی وزیر اعظم ڈاکٹر ہرِنی امرسوریا جمعرات کے روز تین روزہ سرکاری دورے پر ہندوستان پہنچیں گی۔ غور طلب ہے کہ عہدہ سنبھالنے کے بعد یہ ان کا پہلا ہندوستانی دورہ ہوگا۔ وزارتِ خارجہ نے بدھ کے روز بتایا کہ سری لنکا کی وزیر اعظم ہندوستانی رہنماؤں سے ملاقات کریں گی اور ان کے ساتھ مختلف امور دو طرفہ تبادلہ خیال کریں گی۔
سری لنکائی وزیر اعظم ایک نجی ٹیلی ویژن چینل اور چنتن ریسرچ فاؤنڈیشن کے زیرِ اہتمام منعقدہ کانفرنس میں کلیدی خطاب بھی کریں گی۔
ڈاکٹر امرسوریہ، جو وزیر تعلیم کی ذمہ داری بھی نبھا رہی ہیں، ہندوستان میں تعلیم اور ٹیکنالوجی کے شعبے میں باہمی تعاون کے امکانات تلاش کرنے کے لیے انڈین انسٹی ٹیوٹ آف ٹیکنالوجی (آئی آئی ٹی) دہلی اور نیتی آیوگ کا بھی دورہ کریں گی۔
دلچسپ بات یہ ہے کہ سری لنکا کی وزیر اعظم دہلی یونیورسٹی کے ہندو کالج کی سابق طالبہ رہی ہیں، اور اپنے دورے کے دوران وہ اپنے تعلیمی ادارے کا بھی دورہ کریں گی۔ اس کے علاوہ وہ دونوں ملکوں کے درمیان تجارتی تعلقات کو مضبوط کرنے کے لیے ایک کاروباری اجلاس میں بھی شرکت کریں گی۔
یہ دورہ ہندوستان اور سری لنکا کے درمیان جاری اعلیٰ سطحی تبادلۂ خیال کی روایت کو آگے بڑھائے گا اور دونوں ملکوں کے درمیان گہرے اور کثیرجہتی تعلقات کو مزید مستحکم بنائے گا۔
یہ ہندوستان کے ‘اوشین ویژن’ اور ‘پڑوسی فرسٹ’ پالیسی سے متاثر دوستی کے بندھن کو مزید مضبوط کرے گا۔