پولیس افسران کی خودکشی پر ہریانہ حکومت کو جواب دینا چاہئے : سیلجا

نئی دہلی، 15 اکتوبر (یو این آئی) کانگریس کی جنرل سکریٹری شیلجا کماری نے پولیس افسران کی خودکشی کے واقعات پر ہریانہ حکومت کو کٹہرے میں کھڑا کرتے ہوئے کہا کہ ریاست میں انتظامی نظام درہم برہم ہو چکا ہے ، اسی وجہ سے پولیس افسران خودکشیاں کر رہے ہیں۔ انہوں نے کہا کہ آئی پی ایس پورن کمار کے بعد اب اے ایس آئی سندیپ کی خودکشی اس بگڑے ہوئے نظام کی تازہ مثال ہے ۔
محترمہ شیلجا نے بدھ کے روز نامہ نگاروں سے گفتگو کرتے ہوئے کہا کہ اے ایس آئی سندیپ کی خودکشی نہایت سنگین معاملہ ہے ۔ کانگریس شروع سے کہتی آ رہی ہے کہ ہریانہ میں سب کچھ ٹھیک نہیں چل رہا۔ آئی پی ایس افسر کے بعد ایک اور پولیس افسر کی خودکشی کو معمولی واقعہ نہیں سمجھا جا سکتا۔ یہ انتہائی تشویشناک معاملہ ہے اور وزیر اعلیٰ نائب سنگھ سینی کی قیادت والی حکومت کو اس کا جواب دینا چاہیے ۔ انہوں نے یہ بھی کہا کہ ان تمام واقعات کے وجوہات کی گہرائی سے جانچ ضروری ہے ۔
انہوں نے مزید کہا کہ پولیس افسران کا اس طرح سے خودکشی کرنا ظاہر کرتا ہے کہ ہریانہ حکومت میں کچھ بھی ٹھیک نہیں چل رہا۔ ان واقعات سے صاف ظاہر ہے کہ سرکاری نظام پر اب افسران کا بھی اعتماد نہیں رہا۔
محترمہ شیلجا نے کہا کہ آئی پی ایس وائی پورن کمار کے ساتھ جو کچھ ہوا، وہ سب کے سامنے آ چکا ہے ، لیکن اس کے بعد ایک اور افسر کا خودکشی کرنا اس بات کی علامت ہے کہ پولیس افسران کا خود اپنے نظام پر اعتماد ختم ہو چکا ہے ۔ انہوں نے سوال اٹھایا کہ حکومت ان کی مدد کیوں نہیں کر پا رہی اور ایسے حالات کیوں پیدا ہو رہے ہیں کہ پولیس افسران خودکشی کر رہے ہیں۔
انہوں نے کہا کہ یہ ہریانہ حکومت کی سب سے بڑی ناکامی ہے کہ اس کے اپنے افسران اس طرح خودکشی کرنے پر مجبور ہیں۔ اگر حکومت واقعی آزاد اور منصفانہ انصاف کی حامی ہے ، تو اسے یہ پتہ لگانا چاہیے کہ آخر بار بار ایسے حالات کیوں بن رہے ہیں جن کی وجہ سے پولیس افسران خودکشی پر مجبور ہو رہے ہیں۔