مرمو، مودی اور شاہ نے ڈاکٹر کلام کو ان کے یوم پیدائش پر خراج عقیدت پیش کیا

نئی دہلی، 15 اکتوبر (یو این آئی) صدرِ جمہوریہ دروپدی مرمو، وزیرِ اعظم نریندر مودی اور وزیرِ داخلہ امت شاہ نے سابق صدرِ جمہوریہ ڈاکٹر اے ۔ پی۔ جے ۔ عبدالکلام کے یومِ پیدائش پر انہیں خراجِ عقیدت پیش کیا۔
صدرِ جمہوریہ کے سیکریٹریٹ کے مطابق، محترمہ مرمو نے راشٹرپتی بھون میں ڈاکٹر عبدالکلام کی تصویر پر پھول پیش کر کے انہیں عقیدت پیش کی۔
وزیرِ اعظم نریندر مودی نے ڈاکٹر عبدالکلام کو خراجِ عقیدت پیش کرتے ہوئے کہا کہ انہیں ایک دوراندیش رہنما کے طور پر یاد کیا جاتا ہے ، جنہوں نے نوجوان نسل کے ذہنوں میں جوش و ولولہ پیدا کیا اور قوم کو بڑے خواب دیکھنے کی ترغیب دی۔ انہوں نے کہا کہ ڈاکٹر کلام کی زندگی ہمیں یہ یاد دلاتی ہے کہ کامیابی کے لیے انکساری اور محنت لازم ہے ۔ وزیر اعظم نے امید ظاہر کی کہ ہم ڈاکٹر کلام کے خوابوں کے مطابق ایک مضبوط، خود کفیل اورحساس ہندوستان کی تعمیر جاری رکھیں گے ۔
وزیرِ داخلہ امت شاہ نے خراجِ عقیدت پیش کرتے ہوئے کہا، ”ڈاکٹر اے پی جے عبدالکلام جی کو ان کے یوم پیدائش پر سلام پیش کرتے ہیں۔ ایک عظیم سائنسی ذہانت کے حامل ڈاکٹر کلام نے اپنی غیر متزلزل حب الوطنی اور ‘انڈیا فرسٹ’ کے اصول کے ساتھ سائنس، دفاع اور تکنیکی اختراعات میں ہندوستان کو ناقابلِ یقین بلندیوں تک پہنچایا۔”
قابلِ ذکر ہے کہ میزائل مین کے طور پرمعروف ڈاکٹر کلام نے 25 جولائی 2002 سے 25 جولائی 2007 تک ہندوستان کے صدر کی حیثیت سے خدمات انجام دیں۔ اس سے پہلے انہوں نے حکومت کے سائنسی مشیر کے طور پر بھی خدمات انجام دیں۔