این ایچ آر سی نے گجرات میں دو مزدوروں کی موت کا از خود نوٹس لیا

نئی دہلی، 13 اکتوبر (یو این آئی) قومی انسانی حقوق کمیشن (این ایچ آر سی) نے گجرات کے احمد آباد میں ایک اشتہاری ہورڈنگ گرنے کے باعث دو مزدوروں کی موت اور ایک کے شدید زخمی ہونے کے حادثے کا از خود نوٹس لیا ہے ۔
این ایچ آر سی نے پیر کے روز بتایا کہ اس معاملے میں کمیشن نے گجرات حکومت کے چیف سکریٹری اور احمد آباد کے پولیس کمشنر کو نوٹس جاری کرتے ہوئے دو ہفتے کے اندر معاملے کی تفصیلی رپورٹ طلب کی ہے ۔
انہوں نے کہا کہ کمیشن نے اس میڈیا رپورٹ کا از خود نوٹس لیا ہے ، جس میں کہا گیا ہے کہ احمد آباد کے بوپل علاقے میں 27 ستمبر کو ایک سات منزلہ عمارت کی چھت سے ایک اشتہاری ہورڈنگ گرنے کے باعث دو مزدوروں کی موت ہو گئی اور ایک شدید زخمی ہو گیا تھا۔
کمیشن نے کہا ہے کہ اگر میڈیا رپورٹ کی معلومات درست ہیں تو یہ انسانی حقوق کی سنگین خلاف ورزی کا معاملہ ہے ، اس لیے چیف سکریٹری اور احمد آباد پولیس کمشنر کو نوٹس جاری کر کے دو ہفتوں کے اندر مکمل رپورٹ طلب کی گئی ہے ۔
انہوں نے کہا کہ 29 ستمبر کو شائع ہونے والی میڈیا رپورٹ کے مطابق تقریباً 15 مزدور ایک رہائشی عمارت پر تقریباً 80 فٹ کی بلندی پر ہورڈنگ لگا رہے تھے ،تبھی وہ گر گئی۔
نیچے گرنے والے 10 مزدوروں میں سے دو کی موت ہو گئی، ایک شدید زخمی ہوا، جبکہ سات دیگر کو معمولی چوٹیں آئیں، زخمیوں کو علاج کے لیے اسپتال میں داخل کرایا گیا۔