جماعتِ اسلامی اور حریت سے وابستہ افراد کے ٹھکانوں پر چھاپے

سرینگر/۱۳؍اکتوبر
پولیس نے آج سرینگر میں متعدد مقامات پر مربوط تلاشی کارروائیاں انجام دیں جو ان افراد سے منسلک بتائی جا رہی ہیں جن کا تعلق مبینہ طور پر کالعدم جماعتِ اسلامی (جے ای آئی) اور حریت کانفرنس سے ہے۔ یہ کارروائیاں ان تنظیموں کے خلاف جاری کریک ڈاؤن کا حصہ ہیں۔
تلاشی کارروائیوں میں ان گھروں کو بھی شامل کیا گیا جن میں سابق علیحدگی پسند رہنما اشرف سہری کے گھر کی تلاشی بھی شامل تھی۔ اشرف سہری۲۰۲۱ میں حراست کے دوران انتقال کر گئے تھے۔
پولیس کے مطابق تلاشی کارروائیاں متعدد افراد کی رہائش گاہوں پر کی گئیں، جن میں مشتاق احمد بھٹ عرف گوگہ صاحب عرف مشتاق الاسلام (کاشی محلہ، بٹہ مالو)، اشرف سہری (باغات)، معراج الدین کلوال عرف راج کلوال (ریناواری کلوال محلہ، حال مقیم ہمزہ کالونی کنیہامہ، جو اس وقت این آئی اے کی حراست میں ہیں) اور ضمیر احمد شیخ (گلشن نگر، نوگام) شامل ہیں۔
پولیس بیان میں کہا گیا، ’’یہ کارروائیاں مکمل طور پر قانونی تقاضوں کے مطابق انجام دی گئیں۔ دورانِ تلاشی مختلف مواد، بشمول لٹریچر اور تصاویر، جو مبینہ طور پر کالعدم علیحدگی پسند تنظیموں سے منسلک تھیں، ضبط کی گئیں۔ یہ اقدامات وادی میں دہشت گردی اور علیحدگی پسندی کے نظام کو جڑ سے اکھاڑنے کی وسیع تر مہم کا حصہ ہیں، جس کا مقصد ان کے معاون ڈھانچوں اور نیٹ ورکس کو ختم کرنا ہے۔‘‘
سرینگر پولیس نے امن و عامہ برقرار رکھنے کے اپنے عزم کا اعادہ کرتے ہوئے کہا کہ غیر قانونی یا ملک دشمن سرگرمیوں میں ملوث افراد اور گروہوں کے خلاف کارروائی کا سلسلہ جاری رہے گا۔ (ایجنسیاں)